मुख्यमंत्रीन ज्वानु तैं दीं भर्ति (नियुक्ति) पत्र

देरादूण। उत्तराखण्ड मा प्रदेस सरकारन केन्द्र क तरौं प्रदेस मा ज्वान नौनो तैं रोजगार देंण क दिसा मा एक भलि कोसिस कायी। आज सोमबार खूंणि राजधानी देरादूण मा मुख्यमंत्री धामी न सैकड़ों ज्वानु तैं अलग-अलग संस्थाऔं क तरफ बटि दियां नौकरि क भर्ति पत्र दीं।

सबि ज्वान पॉलिटेक्निक बटि पास हूयां छायीं अर नौकरि खुज्याणा छायीं। नौकरि खुज्याणा मा सरकारन ऊंकी मदत कायी। ऐ मौका फर मुख्यमंत्री न बोलि कि प्रधानमंत्री मोदी न बड़ु संकल्प लियूं च जैमा हर साल 10 लाख ज्वानु तैं रोजगार दियें जाणा कु लक्ष्य च। यीं दिसा मा उत्तराखण्ड सरकार बि केन्द्र सरकार क मदत करणि च।

मुख्यमंत्री धामी न बोलि कि हमरि पूरि कोसिस च कि जतगा बि सरकार क शासकीय विभाग छन, अर जै विभाग मा पद खाली छन जल्दी भ्वरैं जाला। उन्न बोलि कि अपडु रोजगार, अर नौकरि क जरिया ज्वानु तैं रोजगार दियें जालु। ऐ मौका फर जौं ज्वानु तैं नौकरि मिलि ऊंक बौत खुस छायीं।

सरकारै तरफा बटि खळाखळ रोजगार म्याळा उर्यें जाणा छन, यां से जादा से जादा ज्वानु तैं रोजगार मिल्यां त दूसर तरफा अपडु काम करणा खूंणि बौत कम दरु फर काम करणा खूंणि लोनि दियें जाणु च, जै से प्रदेसा ज्वान अपड़ा खुट्टौं मा खड़ा ह्वै सक्यां।

मुख्यमंत्री न बोलि कि प्रदेस स्थापना क रजत जयंती फर सरकारन 25 संकल्प लियां छन, यीं कड़ी मा तकनीकी शिक्षा विभाग तैं वीरचन्द्र सिंह गढ़वालि व्यावसायिक शिक्षा मिशन योजना क जिम्मेबरि दियीं च।

ऐ मौका फर कैबिनेट मंत्री सुबोध उनियाल, विधायक प्रमोद नैनवाल, सुरेश सिंह चौहान, अपर मुख्य सचिव श्रीमती राधा रतूड़ी, सचिव रविनाथ रमन, निदेशक प्राविधिक शिक्षा आर.पी.गुप्ता, महानिदेशक यू कॉस्ट प्रो. दुर्गेश पंत अर अधिकारी छायीं।