राजस्व लक्ष्य हासिल करणा खूंणि ऑनलैन सिस्टम पर जादा काम कर्यें ज्यां : मुख्यमंत्री
देरादूण। विभागु तैं राजस्व जमा करणा कु जु बि लक्ष्य एक मैना मा मिल्यूं च, सबि विभाग वै लक्ष्य तैं हासिल कर्यां। तबि साल भर मा राजस्व हासिल करणा कु धर्यूं लक्ष्य हासिल ह्वै सकदु। या बात मुख्यमंत्री धामी न आज सचिवालय मा राजस्व हासिल करणा क बारा मा उर्यीं बैठक मा अधिकारियौं तैं बोलि।
मुख्यमंत्री न बोलि कि राजस्व लक्ष्य हासिल करणा खूंणि विभागु तैं ऑनलैन सिस्टम पर जादा काम करण क दरकार च। उन्न बोलि कि या खूंणि ळोगु तैं जादा से जादा या बात बत्यें ज्यां की क्वीं बि समान मूल्यांण पर वांकु बिल जरूर लियां।
मुख्यमंत्री न अधिकारियौं तैं निर्देश दीं कि राजस्व हासिल करणा खूंणि योजना बण्यें की काम कर्यां। उन्न बोलि कि या खूंणि विभागु तैं नै तकनीक पर खास ध्यान देंण चैंद। उन्न बोलि कि राजस्व बढ़ौंणा खूंणि सबि विभाग मिलिकि काम कर्यां।
मुख्यमंत्री न बोलि कि जै तोक मा उमेद से कम राजस्व मिलणु च, वै तोक मा पता लग्यें ज्यां कि इन्नु किलै हूंण च अर वां कु समाधान कर्यें ज्यां। उन्न बोलि कि विभागु तैं जै तोक मा अबि पिछळ साल क राजस्व वसूली करण, ये दिसा मा ध्यान दियें ज्यां।
मुख्यमंत्री न बोलि कि खनन क तोक मा राजस्व वसूली करण खूंणि ऑनलैन सिस्टम बण्यें ज्यां ।
मुख्यमंत्री न बोलि कि यूपीसीएल अर यूजेवीएनल तैं बि राजस्व बढ़ौंणा क दरकार च। बिजली क चोरि रवक्णा खूंणि कोसिस कर्यें ज्यां।
मुख्यमंत्री न बोलि कि राजस्व कु लक्ष्य हासिल करणा खूंणि हर मैना मा समीक्षा बैठक कर्यें जाली।
बैठक मा कैबिनेट मंत्री प्रेम चंद अग्रवाल, अपर मुख्य सचिव आनन्द बर्द्धन, प्रमुख सचिव आर. के. सुधांशु, प्रमुख वन संरक्षक अनूप मलिक, सचिव आर. मीनाक्षी सुंदरम, दिलीप जावलकर, अरविन्द सिंह ह्यांकी, डॉ. पंकज कुमार पाण्डेय, एच.सी. सेमवाल, विनोद रतूड़ी अर अधिकारी मौजूद छायीं।