सरकरि जमीन बटि कब्जा जल्दी हट्यें ज्यां : मुख्यमंत्री धामी
देरादूण। मुख्यमंत्री धामी न आज सचिवालय मा प्रदेस क सरकरि जमीन बटि कब्जा हटौंण क बारा मा बैठक कायी अर बोलि कि सरकरि जमीन बटि कब्जा जल्दी हट्यें ज्यां।
मुख्यमंत्री न बोलि कि सरकरि जमीन मा कब्जा हटौंणा क बारा मा शासन स्तर फर आज हि शासनादेश जारी कर्यें ज्यां। मुख्यमंत्री न जिलाधिकारी तैं बोलि की शत्रु जैदाद मा जैकि दख्यां अर जै बि शत्रु सम्पति मा जिला प्रशासन न अबि तक कब्जा नीं ल्यायी, वीं जमीन तैं अपड़ा कब्जा मा लियें ज्यां। मुख्यमंत्री न बोलि जै बि जैदाद मा क्वीं पब्लिक प्रोजेक्ट बणि सकदु , वै कु प्रस्ताव बण्यें कि शासन तैं भ्यजें ज्यां।
मुख्यमंत्री न गृह विभाग तैं आदेश दीं कि भैर क मनखि क दगड़ा-दगड़ि किराया क मकान मा रैंण वला ळोगु कु बि सत्यापन कर्यें ज्यां। उन्न बोलि कि ऐ काम मा क्वीं लापरवै नीं हूंणि चैंद। उन्न बोलि कि सबि विभाग एक दुसर क दगड़ मा मिलिकि काम कर्यां अर एक दुसरा क मदत कर्यां।
मुख्यमंत्री न सबि जिलाधिकारियौं तैं निर्देश दीं कि यु तय कर्यें ज्यां कि प्रदेसा मा जु बि प्लाटिंग हूंणि च, वैमा नियमानुसार कारवै हूंणि चैंद, अर कबि क्वीं शिकैत आणि च त, वै अधिकारी पर कारवै कर्यें ज्यां, जु वै काम तैं दय्खणु च।
मुख्यमंत्री न निर्देश दीं कि सबि सरकरि जमीन कु यूनिक नम्बर हूंण चैंद अर सबि विभाग अपणि सरकरि जैदाद कु पंजिका बणैंकि पंजिका मा दर्ज कर्यां। अर सरकरि जमीन कु बगत-बगत मा सेटेलाइन पिक्चर बि लिये ज्यां।।
मुख्यमंत्री न बोलि कि ज्वान नौनो तैं कौशल विकास विभाग क जरिया तकनीकि प्रशिक्षण कु बदबस्त कर्यें ज्यां अर यां खूंणि जतगा बि पैसौं क दरकार ह्वैळी वांकु बन्दबस्त कर्यें ज्यां अर जल्दी से जल्दी शासनादेश निकले ज्यां।
बैठक मा मुख्य सचिव डॉ.एस.एस.संधु, अपर मुख्य सचिव श्रीमती राधा रतूड़ी, आनन्द बर्द्धन, सचिव आर. मीनाक्षी सुंदरम, डॉ. पंकज कुमार पाण्डेय, एच.सी. सेमवाल, विनय शंकर पाण्डेय, उपाध्यक्ष एम.डी.डी.ए. बंशीधर तिवारी मौजूद छायीं।