द्वी विषय मा फेल बच्चौं तैं मिललु पास हूंणा कु मौका

देरादूण। मुख्यमंत्री धामी क अध्यक्षता मा आज सचिवालय मा कैबिनेट बैठक उर्यें ग्यायीं बैठक मा 16 प्रस्तावु मा विचार ह्वै अर शिक्षा विभाग अर पर्यटन से जुड्यां मुद्दों तैं मंजूरी दिये ग्यायी।

कैबिनेट क बैठक मा हूयां फैसळों का बारा मुख्य सचिव एसएस संधू न बतै कि शिक्षा विभागा कै मुद्दों फर फैसळा लिये ग्यीन। जैमा पैळु फैसळा अब स्कुळौं मा सीआपी अर बीआरसी क पदु क भर्ति कर्यें जाली। यांक अलावा बोर्ड इमत्यान मा कंपार्टमेंट आण वळा बच्चों तैं दुबरा पेपर दिंणा कु मौका दियें जाळु। कैबिनेट न यु फैसळा ल्यायी कि अब बोर्ड इमत्यान मा द्वी विषय मा फेल बच्चौं तैं दुबरा इमत्यान देंण कु मौका दिये जाळु। जै से ऊंकु पैढ़ कु एक साल खराब नी हूंया।

मुख्य सचिव न बतै कि कैबिनेट मा सरकार न ईको टूरिज्म पॉलिसी तैं बि मंजूरी दे द्यायी। प्रदेस मा जतगा बि ईको टूरिज्म केन्द्र छन ऊंकी कमै कु 10 प्रतिशत हिस्सा कोषागार मा जमा कर्यें जाळु अर बाकी केन्द्र कु विकास मा खरच ह्वाळु।

मुख्य सचिव न बतै कि चाइल्ड केयर लीव 2 साल कर्यें ग्यें। जु बच्चा क 18 साला क उमर तक राली।

कैबिनेट बैठक मा एक प्रस्ताव बि गोवंश तैं लेकैकि ह्वै। अब वु गौर जौकु क्वीं सै गुसैं नीं च, ऊं गौरू क भरण पोषण खूंणि अबि तक सरकार क तरफ बटि 30 रुप्या जान्द छायीं, तैं बढ़ै कि 80 रुप्या कर्यें ग्यें।

यांका अलाव कैबिनेट मा जमरानी बांध प्रभावितु खूंणि 300 एकड़ जमीन देंणा अर नजुल नीति तैं एक साल अगनै बढ़ौंणा कु फैसळा सामिल च।