राज्यपाल अर मुख्यमंत्री न श्री हेमकुंड साहिब जातरा कु पैळु जातरियौं क जत्था तैं फट्यायी

देरादूण। राज्यपाल लेफ्टिनेंट जनरल गुरमीत सिंह अर मुख्यमंत्री धामी न आज हेमकुंट साहिब गुरुद्वारा ऋषिकेश मारी हेमकुंड साहिब जातरा कु पैळु जातरियौं क जत्था तैं फट्यायी। ऐ मोका फर गुरुद्वारा मा मत्थ टेकी अर प्रदेस क रैवासियौं क जस अर राजि खुसी रैंया या कामना कायी।

मुख्यमंत्री न बोलि कि प्रदेस सरकारा न हेमकुण्ड साहिब क जातरा मा जाण वळा जातरियौं खूंणि सबि बन्दबस्त कै याली। उन्न सबि जातरियौं से विनति कायी कि जातरा मा जाण से पैळि अपडु शरैळ जांच जरूरी कर्यां।

मुख्यमंत्री न बोलि कि चारधाम जातरा जोर-शोर से चलणि च। उन्न बोलि कि पिछल साळ 50 लाख से जादा जातरियौं च चारधाम मा दर्शन करिन। ऐसु का साळ यां से जादा जातरियौं क औंणा क उमेद च। उन्न बोलि कि सरकार क कोसिस च कि देवभूमि मा औंण वळा जातरियौं तैं क्वीं बि दिकदरि नीं हूंण चैंद।

मुख्यमंत्री श्री केदारनाथ अर श्री हेमकुण्ड साहिब मा रोप वे कु शिलान्यास करण पर प्रधानमंत्री नरेन्द्र मोदी कु आभार बोलि। उन्न बोलि कि रोप वे बणण से जातार सजिळु ह्वै जाली।

ऐ मौका फर कैबिनेट मंत्री सतपाल महाराज, प्रेम चंद अग्रवाल, सुबोध उनियाल, सांसद अर पैल्यक मुख्यमंत्री डॉ. रमेश पोखरियाल निशंक, मेयर ऋषिकेश श्रीमती अनीता ममगाई, महिला आयोग की अध्यक्ष श्रीमती कुसुम कंडवाल, गुरुद्वारा श्री हेमकुंड साहिब मैनेजमेंट ट्रस्टा अध्यक्ष नरेंद्रजीत सिंह बिंद्रा छायीं।