कोटद्वार क् सुषमा खर्कवाल बणि लखनौ मेयर

देरादूण। उत्तरप्रदेसा निकाय चुनौं मा भाजपा क बड़ी जीत ह्वै। त वखि उत्तरप्रदेश क राजधानी लखनौ मा भारतीय जनता पार्टी क मेयर सुषमा खर्कवाल न सपा क वंदना तैं हरे कि जीति। सुषमा खर्कवाल न वंदना मिश्रा तैं 204161 बोटुन हर्रे कि जीत हासिल कायी।

यखम बड़ी बात या च क सुषमा खर्कवाला मूल रुप मा कोटद्वार हल्दूखाता क रैवासी च। सुषमा खर्कवाल न श्रीनगर गढ़वाल विश्वविद्यालय बटि स्नातक क पढ़ै कायी। सुषमा खर्कवाल तीन बणियौं मा सबसे छ्वटि च। सुषमा खर्कवाल कु ब्यो 1984 मा प्रेम खर्कवाल क दगड़ मा ह्वै। जौकि कुटुम्दरि बौत पैळि बटि लखनौ मा हि रैंद छायीं। सुषमा क जीत क बाद कोटद्वार भाबर मा उंकी कुटुम्दरि मा खुसी च।

सुषमा क लखनौ क मेयर बणणा क बाद उत्तराखण्ड मा जनता बौत खुसी च अर सुषमा क जीत तैं बौत बड़ी उपलब्धि बतौंणा छन।