अटल उत्कृष्ट विद्यालय कु खराब परीक्षाफल देखिक महानिदेशक बंशीधर तिवारी नराज

देरादून। CBSE इमत्यानु क परीक्षाफल आणा क बाद अटल उत्कृष्ट विद्यालयु क परीक्षाफल तैं देखिक शिक्षा विभाग उमचाट मा च। इन्न मा शिक्षा महानिदेशक बंशीधर तिवारी न आज सबि जिलों क शिक्षा अधिकारियों तक दगड़ वीडियो कॉन्फ्रेंसिंग क जरिया उत्कृष्ट विद्यालयु कु परीक्षाफल क समीक्षा कायी। समीक्षा मा या बात समणि ऐ कि कै स्कुळु मा बच्चौं क सप्लीमेंट्री अयीं च, जु जुन मा ह्वैळी। इन्न मा शिक्षा अधिकारियौं तैं निर्देश दियेंग्यीं कि जौ बच्चों क स्पलीमेंट्री अयीं च वख रुड़ियों क छुट्टी मा बि स्कुळ ख्वलें जाळा अर स्कुळयां नौन्याळु तैं इमत्यान क त्यारि कर्यें जाली।

प्रदेस मा 10 कक्षा मा 39 स्कुळ इन्न छन जख अद्धा बच्चा पास नीं हूंया छन। त वखि कक्षा 12 मा 59 स्कुळ इन्न छन जख 50 प्रतिशत से कम बच्चा हि पास हूयां छन।
155 अटल उत्कृष्ट विद्यालयु मा कक्षा 10 मा 8625 बच्चा हि पास हूयीं अर कक्षा 12 मा 12753 मा बटि 6481 बच्चा पास हूयीं। इन्न मा करोड़ौं रुप्यां खरच कैकि अच्छी शिक्षा कु सिपुन दिय्खण वळु शिक्षा विभाग क पोल खुळि ग्यायी।

बोर्ड क इमत्यानु मा अटल उत्कृष्ट स्कुळु क खराब परीक्षाफल आण पर महानिदेशक बंशीधर तिवारी नराज छन। उन्न अफसरु क दगड़ बैठक कायी अर निर्देश दीं कि मास्टर अखबारु मा बयानबाजी करणा क बजाय स्कुळु मा बच्चौं तैं पढ़ौंणा कु काम करण फर टक (ध्यान) लग्यां।
बैठक मा या बात समणि ऐ कि सुगम स्कुळु कु परीक्षाफल जादा खराब च। महानिदेशक न बोलि परीक्षाफल सुधार मा क्वीं कमी नी हूंण चैंद। उन्न बोलि जौ स्कुळा कु परीक्षाफल खराब च अर जौं बच्चों कंपार्टमेंट अयीं च, वु बच्चौं तैं पढ़ौंणा खूंणि रुड़ियों क छुट्टी मा बि स्कुळ ख्वलें जाळा।