शहीद रुचिन तैं सैनिक सम्मान क दगड़ दियें ग्यायी आखरि विदै

चमोली। जम्मू कश्मीर क् राजौरी सेक्टर मा ऑपरेशन त्रिनेत्र मा शहीद हूंया रुचिन सिंह रावत क पार्थिव शरैल ऊंका गौं मा कुनिगाड़ मा पौंचि। जन्नि ऊंकु पार्थिव शरैल घौर मा पौंचि उन्न उंकी दद्दा-दद्दी ब्वे-बुबा अर घरवळि कु र्वै-र्वै कु बुरु हाल ह्वैग्यें। शहीदा कु शरैल तैं देखिक गौ वळों का आंखों मा पाणि ऐग्यें।

शहीद रुचिन तैं ऊंका दद्दा कलम सिंह, दद्दी मालती, बुबा राजेन्द्र सिंह रावत, घरवळि कल्पना, बैणि गीता देवी न पुष्पचक्र अर्पित कैकि श्रद्धांजलि द्यायी। शहीद रुचिन तैं उंक छ्वटै भै विवके रावत न आग द्यायी।

ऐ मौका फर भारत माता की जय, वंदे मातरम अर शहीद रुचिन सिंह अमर रहे! क नारा पूरु घाट मा सूंण दिंणा छायीं। सेना क ज्वानु न देसा क रक्षा मा अपड़ि जान देंण वळु शहीद रुचिन तैं सलामी दे।

ऐ मौका फर विधायक अनिल नौटियाल, भाजपा जिलाध्यक्ष रमेश मैखुरी, हरिकृष्ण भट्ट, डॉ. अवतार नेगी, हीरा फनियाल, गंगा पंवार, लीलधर जोशी, कुनीगाड़ गौ क् प्रधान सीता देवी अर हजारों ळोगुन शहीद तैं नम आंखौंन आखिरी विदै द्यायी।

बतै दियां के 29 साळ का रुचिन रावत उधमपुर मा 9 पैरा कमांडो मा छायीं अर जम्मू कश्मीर मा राजौरी सेक्टर मा ऑपरेशन त्रिनेत्र मा आईईडी ब्लास्ट मा शहीद ह्वैग्यें छायीं।