सरकार चमोली जिला क ध्वाड़ा, खच्चर मालिकु क दगड़ मा खड़ी च : महाराज
देरादूण। पर्यटन मंत्री महाराजन बोलि कि केदारनाथ जातरा मा चमोली जिला क ध्वाड़ा, खच्चरु मालिकौं क मदत बि ल्यें जाली अर ऊंकु बुरु नी कर्यें जाळु। पर्यटन मंत्री न ध्वाड़ा, खच्चरु क मालिकु तैं भरोसु दे अर बोलि उंकु दगड़ मा क्वीं भेद नीं कर्यें जाळु। उन्न जिलाधिकारी तैं ध्वाड़ा अर खच्चरु क मालिकौं क बारा मा न्यायालय मा याचिका दाखिल करणा खूंणि बोलि।
सतपाल महाराजन बोलि कि मेरी जाणकारी मा या बात ऐ कि चमोली जनपदा का ध्वाड़ा, खच्चर मालिकौं तैं केदारनाथ जातरा मा लैसेंस नीं मिलणु च, जै सै ऊथैं दिकदरि हूंणि च। उन्न जिलाधिकारी तैं खड़खडु बोलि कि न्यायालय मा याचिका दाखिल कर्यें ज्यां।
सतपाल महाराजन बोलि कि ऐ मामळा मा ऊंकी शासन मा अधिकारियौं क दगड़ मा बात ह्वै। उन्न बतै कि केदारनाथ धाम मा ध्वाड़ा खच्चरु क संख्या तय च। जैका कारण चमोली जिला क ध्वाड़ा, खच्चर मालिकौं तैं लैसेंस नी मिलणा छन।
महाराजन बोलि चमोली क ध्वाड़ा खच्चर मालिकौं क दगड़ केदारनाथ जातरा मा क्वीं भेद नीं कर्यें जाळु अर ऊथैं बि जातरा मा भगीदार बण्यें जाळु। महाराजन बोलि कि सरकार चमोली क ध्वाड़ा, खच्चर मालिकौं क दगड़ मा खड़ी च अर जल्दी हि ऊंकी दिकदरि तैं जल्दी ठीक खतम कर्यें जाळु।