गढ़वाल मण्डल आयुक्त सुशील कुमार न बाबा केदार क दर्शन करिन अर जातरा बन्दबस्त तैं देखि अर अधिकारियौं तैं निर्देश दीं

केदारनाथ। केदारनाथ धाम क पाट खुलण मौका फर गढ़वाल मण्डल आयुक्त सुशील कुमार न बाबा केदार क दर्शन करिन अर प्रदेसा जस अर राजी खुसी क कामना भगवान से कायी।

गढ़वाल मण्डल आयुक्त सुशील कुमार अर पुलिस महानिरीक्षक गढ़वाल परिक्षेत्र करन सिंह नगन्याल न केदारनाथा मा जातरा पड़ाव मा पुलिस अर जिला प्रशासन कर्या बन्दबस्त क तैं देखि अर जातरा मा अयां जातरियौं क दगड़ मा बात कायी।

गढ़वाल आयुक्त न जातरा बन्दबस्त मा लग्यां विभागु अर पुलिस प्रभारियौं तैं जातरा मा अंया भक्तु क सेवा करणा कु अर अपड़ु हिकमत तैं बढ़ौंणा क निर्देश दीं। गढ़वाल आयुक्त न बोलि कि सुरू मा थ्वड़ा दिकदरि ह्वै सकदन पर जन्नि बगत बीतळु सब ठीक ह्वै जालु। उन्न बोलि कि सुरु मा जातरियौं मा उमंग हूंदन पर जन्नि जातरा बढ़दि जान्द उन्न थक लगणा क कारण जातरियौं कु स्वभाव बदलि ह्वै जान्द पर तुमथैं अपडु स्वभाब सब्यौं क दगड़ मा म्याळु हि रखण, किलैकि जातरि न सदनि नी आणु , इल्लै जन हमरु बरतौव जातरियौं क दगड़ मा राळु उन्नि वैक ज्यूं मा हमरि अर प्रदेसा पछ्याण जाली।