उत्तराखण्ड मा ह्यूं , ह्यूं क पाड़ टुटणा उमेद, मौसम विभागन कायी खबरदार

देरादूण। केदारधाम मा आण वळा छै-सात दिनुमा खळाखळ ह्यूं प्वड़णा क् उमेद च। डीजीपी पुलिस अशोक कुमार न पुलिस तैं त्यार रैंणा खूंणि बोलि याली। उन्न एसडीआरएफ अर आवश्यक सेवाओं तैं चंक (सर्तक) रैंणा खूंणि बोलि।

डीजीपी अशोक कुमार न बतै कि केदारनाथ धाम मा छै-सात दिनुमा खळाखळ ह्यूं प्वाड़णा क उमेद च। उन्न ह्यूं प्वड़णा क बारा मा खबर सोशल मीडिया, न्यूज चैनल, समाचार पत्र मा प्रचार-प्रसार करणा खूंणि बोलि। उन्न चारधाम जातरा मा औंण वळा जातरियों तैं बोलि कि मौसम साफ हूंण क बाद हि अपणि जातरा कर्यां।

बतै दियां बल डिफेंस जियो इन्फॉर्मेटिक्स एंड रिसर्च एस्टेबलिशमेंट (डीजीआरई) चंडीगढ़ न उत्तरकाशी, चमोली अर रुद्रप्रयाग मा हिमस्खलन क चेतावनी बि दियीं च। इन्न मा पुलिस, एसडीआरफ, फायर सर्विस, आपदा राहता कामु मा लग्यां कर्मचारी अर विभागों तैं चंक रैंणा खूंणि ब्वलें ग्यें। डीजीपी न बोलि कि एसडीआरएफ अर आपदा राहत वळा विभागु तैं पैहि इन्न जगों मा भेजि याली जख आपदा क उमेद जादा।