एसडीआरएफ न ळोगुक ज्यूं मा अलग हि पछ्याण बण्यें : मुख्यमंत्री धामी

देरादूण। मुख्यमंत्री धामीन आज जौलीग्रान्ट मा एसडीआरएफ क नै बण्यूं मुख्यालय अर फायर स्टेशन कु लोकार्पण कायी। ऐ मौका फर मुख्यमंत्री न एसडीआरएफ क् ज्वानु तैं प्रशस्ति पत्र देकैकि सम्मानित बि कायी।

कार्यक्रम मा मुख्यमंत्री न घोषणा कायी कि 11 हजार फीट से जादा ऊंचै मा मदता क कामु खूंणि एसडीआरएफ मा काम करण वळा राजपत्रित अधिकारियौं तैं अर्द्धसैनिक बलु क जन 1500 रुप्यौं अर अराजपत्रित अधिकारियों तैं 1000 रुप्यां भत्ता दिये जाळु। मुख्यमंत्री न बोेलि कि आपदा प्रबन्धन मा ब्यटुळौं तैं अगनै बढ़ौंणा कु मकसदन एसडीआरएफ क छठी कम्पनी कु गठन कर्यें जालु। जैमा पैळि एक तिहाई ब्यटुला कार्मिकौं क् भर्ति कर्यें जाळि। एसडीआरएफ मा प्रतिनियुक्ति तैं 07 साल से बढ़ै कि 10 साल कर्यें ग्यायी। मुख्यमंत्री न बोलि कि 144.43 करोड़ रुप्यौं से बणण वळु एसडीआरएफ कु मुख्यालय मा प्रशिक्षण अर आपदा प्रबंधन क कामु क अळाव औरि काम बि ह्वाळा। उन्न बोलि कि एसडीआरएफ क ज्वानु अर अधिकारियों अपड़ा कर्तव्य, हिकमत, वीरता, सेवा अर समर्पण से करणा छन।

मुख्यमंत्री बोलि कि एसडीआरएफ उत्तराखण्ड न अपणा काम करणा कु तरीकौं न अर हिकमत न प्रदेस मा रैवासियौं क दगड़ धार्मिक, अध्यात्मिक अर साहसिक पर्यटन खूंणि प्रदेस मा आण वला लाखों मनखियों क् ज्यूं मा अलग हि पछ्याण बण्यें।

कार्यक्रम मा हरिद्वार सांसद डॉ. रमेश पोखरियाल निशंक, अपर मुख्य सचिव श्रीमती राधा रतूड़ी, पुलिस महानिदेशक अशोक कुमार बि अपड़ा विचार धरिन।

ऐ मौका फर विधायक बृज भूषण गैरोला, सचिव आपदा प्रबंधन डॉ. रंजीत कुमार सिन्हा छायीं।