दिनमा हि गौरु तैं टमकौणा खूंणि आणु च बाघ, डर्यां छन ळोग
पौड़ी। गढ़वाल वन प्रभाग मा कॉर्बेट नेशनल पार्क क् गौ मा कै दिन बटि बाघ लगयूं च। लैंसडाउन विधानसभा क्षेत्रा नैनीडांडा क् रिखणीखाल धुमाकोट ब्लॉक मा अबि तक बाघ द्वी मनखियौं तैं खै ग्यें अर अब बाघ दिनमा हि गौरु तैं टमकौणा (मारने) खूंणि आणु च।
रिखणीखाल तहसील क पापड़ी गौ मा दिनमा घौर क समणि हि बाघ न दूद देंण वळा गौरु फर हमला कै दे। बाघ न एक बाछि तैं पकड़ि दे छायी, तबरि गौड़ि न बाघ पर हमला कै दे अर बाछि तैं छुड्डै़ दे।
त वखि जिलाधिकारी पौड़ी न उच्च अधिकारियों क दगड़ मा बैठक कायी अर बोलि कि बाघ तैं ट्रेंकुलाइज कै कि पकड़े ज्यां।
धुमाकोटा क रैवासियौं न धुमाकोट बाजार मा प्रदर्शन कायी अर मुख्यमंत्री धामी से बाघ तैं आदमखोर घोषित करणा क मांग कायी।