उत्तराखण्ड कांग्रेस क नेतौं क बीच हूयीं झंगज्याट तैं खतम करणा खूंणि कांग्रेस पर्यवेक्षक ऐग्यींन देरादूण

देरादूण। उत्तराखण्ड कांग्रेस अपणा बड़ा नेतौं क कारण झंगज्याट मा च। उत्तराखण्ड मा कांग्रेसा नेता एक दुसर क टंगड़ौं तैं खिंचणा छन। जै कारण से कांग्रेस क कुछ नेता भाजपा क नजीक छन अर कांग्रेस कु हत्थ छोड़िकि भाजपा कु हत्थ पकड़ि सकदन, इन्नि छ्वीं चौतर्फा सदनि हूंणि रैंद।

कांग्रेस क पार्टी मा हूयीं यीं झंगज्याट थैं खतम करणा खूंणि कांग्रेसा बड़ा नेता पीएल पूनिया थैं अब कांग्रेस हाईकमानन पर्यवेक्षक बण्यें कि देरादूण मा भेजि।

पी ए पूनिया उत्तराखंड क नेतौंक बीच मा चलणि लड़ै थै खतम करणा खूंणि देरादूण पौंचिग्यींन। पूनिया 17 अप्रैल तक देरादूण मा राला। आज पीएल पुनिया जब देरादूण मा पौंचिन त ऊंका दगड़ मा उत्तराखण्ड प्रदेस प्रभारी देवेन्द्र यादव बि छायीं।

जौलीग्रान्ट मा पी एल पूनिया कु स्वागत करणा खूंणि उत्तराखण्ड प्रदेश कांग्रेस क अध्यक्ष करण माहरा, कांग्रेस क नेता प्रीतम सिंह लालचंद शर्मा क दगड़ मा बौत सर्या कांग्रेसी नेता छायीं।