क्लेमेन्टाउन मा मार पिटै करण वळों तैं पुलिसन पकड़ि याली

देरादूण। क्लेमेन्टाउन क्षेत्र मा स्कुळया नौनों क बीच ह्वीं मारपिटै क घटना क बारा मा द्वियां पक्ष न पुलिस मा रिपोर्ट दर्ज कै, पुलिसन मा तहरीर लेकैकि सम्बन्धित धारौं मा केस दर्ज कै याली। जैका बाद पुलिसन कुछ ळोगु थैं पकड़ि अर छाळताळ करणि च।

क्लेमेन्टाउन मा 12 तारिख खूंणि स्कुळया नौनों क बीच मा ह्वै मारपिटै कु वीडिया सोशल मीडिया मा खूब रिटणु च। जैका बाद पुलिस न वीडियो देखिक मारपिटै मा सामिल ळोगु थैं पछ्याणि क अब कारवै सुरू कै याली। मारपिटै मा सामिल द्वियां गाड़ियौं तै पुलिसन पकड़ि की सीज कै याली। मारपिटै मा ग्राफिक एरा संस्थान कु एक नौना कु नौ आणु च। पुलिसन जब ऐ बारा मा ग्राफिक ऐरा मा बतै त ग्राफिक एरा प्रबंधन न वैथें संस्थान बटि निकाळि दे।

ये बारा मा पुलिस उप महानिरीक्षक अर पुलिस वरिष्ठ अधीक्षक कु साफ ब्वन च कि कखि बि अर कै बि जगा मा इन्न घटना करण वळों थैं कतई नी छ्वड़ें जाळु अर सखत से सखत कारवै कर्यें जाली।