मुख्यमंत्री न शिक्षा विभागा उर्यूं ‘प्रवेशोत्सव’ कार्यक्रम मा भाग ल्यें अर बोलि शिक्षा मा बदलाव जरुरी च

देरादूण। मुख्यमंत्री धामीन आज देरादूण मा शिक्षा विभागा उर्यूं ‘प्रवेशोत्सव’ कार्यक्रम मा भाग ल्यें। ऐ मौका फर उन्न नेताजी सुभाष चन्द्र बोस आवासीय विद्यालय बनियावाला मा बण्यूं नै भवन कु शिलान्यास कायी। मुख्यमंत्री न स्कुळ मा 8 पास करण वळि नौनियु थैं मैट्रिकुलेशन सेरेमनी से अलंकृत कायी अर प्राथमिक स्कुळु मा 21 हजार से जादा मास्टरु थैं टेबलेट खूंणि डीबीटी क जरिया 21 करोड़ 76 लाख रुप्यौं खातौं मा डाळिन।

मुख्यमंत्री धामी न बोलि बगत क दगड़ मा शिक्षा मा बदलौ जरुरी च। उन्न बोलि ज्ञान अर शिक्षा केवल कितबी नी हूंण चैंद। शिक्षा कु मकसद मनखि कु सबि तरौं विकास हूंण चैंद। अर चर्या तरफा कु विकास बिना बदलौं से नी ह्वै सकदन।

मुख्यमंत्री न बोलि कि बालिका शिक्षा थैं बढ़ावा देणा खूंणि सरकार खळाखळ कोसिस करणि च। मुख्यमंत्री न बोलि कि प्रधानमंत्री मोदी कु बेटी बचाओ, बेटी पढ़ाओ कु नारा दियूं च जै थैं हमथैं पूरु कै कि दिखाणु च। मुख्यमंत्री न बोलि कि नै शिक्षानीति से स्कुळ अर उच्च शिक्षा का नै आयाम प्राप्त ह्वाळा जैमा सबि वर्गा नौन्याळु थैं समानता क आधार पर शिक्षा मिलळि अर रोजगार खूंणि शिक्षा मिललि अर भर्ति इमत्यानु क अलग से त्यारि नी करण प्वाडळि।

ऐ मौका फर शिक्षा मंत्री डॉ. धन सिंह रावत , विधायक सहदेव पुंडीर, दिलीप रावत, मोहन सिंह मेहरा, सचिव शिक्षा रविनाथ रमन, महानिदेशक शिक्षा बंशीधर तिवारी शिक्षा विभाग क अधिकारी छायीं।