पेपर लीक मामला मा चंपत हुयूं 500 हजार रुप्यौं कु ईनामी संजय धारीवाल गिरफ्तार

देरादूण। पेपर लीक मामला मा चंपत (फरार) 500 हजार रुप्यौं कु ईनामी भाजपा नेता संजय धारीवाल थैं एसआईटी न पकड़ि याली। पुलिस न वैका कब्जा बटि चार लाख 25 हजार रुप्या अर द्वी खाली चेक बरामद करिन।

एसएसपी हरद्वार व एसआईटी प्रभारी अजय सिंह न बतै कि पटवारी पेपर लीक मामळा मा थाना कनखल पर दर्ज मुकदमा मा चंपत संजय धारीवाल थैं एसआईटी क टीम न नारसन तोक मा पकड़ि। संजय धारीवाल पटवारी/ लेखपाल अर जेई / एई भर्ति मा अरोपि छायीं अर पुलिस से बचणा खूंणि कोर्ट मा सरेंडर करणा क कोसिस करणु छायीं।

संजय धारीवाल फर आईजी गढ़वाल करण सिंह नगन्याल न पचास हजार रुप्यौं क इनाम घोषित कर्यूं छायीं अर वै थैं पकड़णा खूंणि एसआईटी लगातार कोसिस करणि छायीं। एसआईटी न आरोपि थैं नारसन बटि पकड़ि याली।

आरोपि क बत्यां फर पुलिसन अभ्यर्थियौं थैं नकल करणौं खूंणि जै गाड़ि कु इस्तमाल कायी एचआर 75-5692 थैं बि बरामद कै याली। संजय धारीवाल क भै सुधीर कु घौर करनाल हरियाणा बटि चार लाख पच्चीस हजार रुप्या अर द्वी सैन हूयां, खाली चैक बि बरामद करिन।