केदारनाथ धाम मा खळाखळ प्वाणणु ह्यूं , जतरा क तय्यरि पूरि करण मा ह्वैग्यें दिकदारि

रुद्रप्रयाग: प्रदेसा मा मौसम लगातार खराब हूंण च अर पाडु मा ह्यूं प्वाणणु च। केदारनाथ धा मा ब्याली राति बटि ह्यूं प्वाणणु च। धाम मा एक फीट तक ह्यूं पौड़िग्यें।

केदारनाथ धाम मा खळाखळ प्वाणणु ह्यूं न जातरा क तय्यरि मा मुसिबत खड़ी कै याली। भगवान केदारनाथ क पाट ख्वलणा मा अबि 24 दिन बच्यां छन पर धाम मा खळाखळ प्वाणणु ह्यूं क कारण धाम मा जतरा क तय्यरि बगत मा पूरि करण एक चुनौती कु काम ह्वैग्यें।

केदारनाथ धाम कु बाटु अबि तक नी खुलि। लिनचोली बटि केदारनाथ तकाक बाटौं बटि ह्यूं भुरत्यौं न हट्टें याली छायीं पर दुबरा ह्यूं प्वणणा क बाद बाटों मा ह्यूं हि ह्यूं दिख्येंणु च। ह्यूं क कारण धाम मा जड्डु ह्वैग्यें। जै कारण दुबरा काम करणा मा बौत मुसिकल हूंणि च। जातरा मा अबि 24 दिन हि बच्यां छन अर मौसम लगातार खराब हूंणू च जै कारण प्रशासन क समणि बौत बड़ी समस्या खड़ी ह्वैग्यें।