मुख्यमंत्री न कायी चारधाम जातरा क तय्यरि क समीक्षा
देरादूण। मुख्यमंत्री धामीन आज सचिवालय मा चारधाम जातरा क तय्यरि क बारा मा समीक्षा बैठक कायी अर अधिकारियौं थैं निर्देश दी कि आण वली जातरा खूणि प्रदेसा रैवासियों खूंणि पंजीकरण क दरकार थैं खतम कर्यें ज्या। मुख्यमंत्री न बोलि कि प्रदेसा मा आण वळा सबि श्रद्धाळुऔं थैं दर्शन कर्यें जाळा। उन्न निर्देश दीं कि जौन चारधाम जातरा खूंणि होटळु अर होमस्टे क बुकिंग कर्यीं च ऊंका दर्शन खूंणि बदबस्त कर्यें ज्यां।
मुख्यमंत्री न बोलि कि देवभूमि उत्तराखण्ड मा आण वळा श्रद्धाळु चारधाम क दगड़ा-दगड़ि औरि धार्मिक अर पर्यटक क जगों मा बि ज्यां। उन्न बोलि कि यां खूंणि पर्यटन, पुळिस अर परिवहन विभाग ळोगु थैं जागरुक कर्यें ज्यां। मुख्यमंत्री न बोलि कि प्रदेसा घर्या बढ़ि चीजु थैं बढ़ावा दियें ज्यां अर गढ़वाल मण्डल मा बि घर्या चीज रखें ज्या।
मुख्यमंत्री न बोलि कि चारधाम जातरा मा डरैबरु खूंणि सीणा (सोने) क अच्छु बन्दबस्त करणा क निर्देश दीं। उन्न बोलि कि जातरा मा बन्दबस्त खूंणि स्थानीय रैवासियौं थैं यात्रा मित्र बण्यें ज्यां। यात्रा मा आण वलि गाड़ियौं क फिटनेस कु भी खास ध्यान दियें ज्या। उन्न बोलि जातरियौं बटि जु बि जाणकारी लियें ज्यां वु एक हि जगा मा लियें ज्यां।
बैठक मा मुख्य सचिव डॉ. एस.एस. संधु, अपर मुख्य सचिव श्रीमती राधा रतूड़ी, पुलिस महानिदेशक अशोक कुमार, सचिव आर. मीनाक्षी सुंदरम, शैलेश बगोली, अरविंद सिंह ह्यांकी, सचिन कुर्वे , एच.सी. सेमवाल, गढ़वाल आयुक्त सुशील कुमार छायीं।