मेयर सुनील उनियाल गामा न पदु कु गलत इस्तेमाल कायी, ऊंकी जैदादा जांच हूंण चैंद : नवीन जोशी

देरादूण। उत्तराखण्ड प्रदेस कांग्रेस कमेटी क महामंत्री नवीन जोशी न देरादूण मेयर सुनील उनियाल गामा क करोड़ रुप्यौं क जैदाद थैं लेकैकि बोलि कि आखिर एक लोक सेवक न चार साळु मा करोड़ों रुप्यौं क जैदाद कनकैकि जोड़ि याली। उन्न बोलि कि गामा आज 20 करोड़ रुप्यौं से जादा जैदादा मालिक कनकैकि बणिग्यीं? उन्न मेयर फर यु आरोप लग्यें कि लोक सेवक क पदु कु गलत इस्तेमाल कायी, इल्लै ऊंकी अर वुकीं सर्यां कुटुम्दरि क जैदाद क सीबीआई जांच हूंण चैंद।

प्रदेस कांग्रेस कमेटी क महामंत्री नवीन जोशी न नगर निगम क महापौर सुनील उनियाल गामा पर महा भ्रष्टाचारी हूंण कु आरोप लग्यें अर बोलि कि जै बगत उन्न राजधानी देरादूणा मेयर लोक सेवका कु पद सम्भाळि तब उंकी जैदाद अर 4 साल बाद आज उंकी जैदाद 10 गुणा जादा कनकैकि ह्वैग्यें? उन्न बोलि कि एक लोकसेवक क 4 साल मा इतगा जादा जैदाद भ्रष्टाचार नीं त क्या च?

नवीन जोशी न बोलि बल प्रदेसा सरकारा क जीरो टॉलरेंस क सबि दावा ख्वखळा छन, सर्या प्रदेस सरकार गौळा तक भ्रष्टाचार क मा डूब्यीं च।

नवीन जोशी न बोलि कि राजधानी देरादूण क मेयर सुनील उनियाल गामा च जीरो टॉलरेंस वळि भाजपा सरकार क पोळ खोळि दें।

नवीन जोशी न सुनील उनियाल गामा फर आरोप लग्यें कि मेयर बणणा क बाद एक लोक सेवका न अपड़ा पदा गरिमा थैं चिथड़ा-चिथड़ा करणा कु काम कायी। उन्न बोलि कि मेयर गामा न अपड़ि अर अपड़ा कुटुम्दरि थैं 20 करोड़ रुप्यौं कु मालिक बण्यें की द्यब्तौं क भूमि मा महापाप कायी, वु माफी क लैंक नीं छन। कांग्रेस क प्रदेस महामंत्री न गामा क जैदाद क सीबीआई से जांच करणौं क मांग कायी।