मुख्यमंत्री न दिली-देरादूण एक्सप्रेस अर डाटकाली सुरंग कु निरीक्षण कायी

देरादूण। मुख्यमंत्री धामी न आज इत्वार खूंणि दिली- देरादूण एक्सप्रेस मा चलण वला कामु क निरीक्षण कायी। मुख्मयंत्री न डाटकाली मा बणणि एलीवेटेड सड़क अर डाटकाली मा बणणि सुरंग थैं बि देखि।

मुख्यमंत्रीन एनएचआई क अधिकारियों बटि जाणकारी ल्यायी अर बगत मा काम पूरा करणा खूंणि अर गुणवत्ता कु खास ध्यान देंणा खूंणि बोलि। उन्न बोलि कि दिली- देरादूण एक्सप्रेस मा जु बि काम हूंण छन, वैमा औरि तेजी कर्यें ज्यां। एनएचआई थैं जु बि मदत प्रदेस सरकार से चैंणिच वु दियें जाली।

मुख्यमंत्री न बोलि कि दिली-एक्सप्रेस वे बणणा क बाद देरादूण बटि दिली क दूरी द्वी से ढ़ाई घण्टा मा पूरि ह्वै जाली। उन्न बोलि कि यीं परियोजना क पूरु हूंण पर उत्तराखण्ड थैं बौत फैदा होळु। अर दिली बटि देरादूण आण वळों क जातरा असान ह्वै जाली। उन्न बोलि बल जतगा तेजी से सड़कियौं के जाळ बढ़णु च वै से आण वळु बगत मा प्रदेसा आर्थिक गतिविधि मा औरि तेजी ऐ जाली।

मुख्यमंत्री न ऐ मौका फर एक्सप्रेस वे फर काम करणा भुरत्यौं (मजदूरों) क दगड़ मा बात कायी अर हालचाल पूछि। मुख्यमंत्री न एनएचआई क अधिकारियों थैं बोलि कि भुरत्यौं कु स्वास्थ्य अर रैंण, खाण-पिणा बन्दबस्त कु खास ध्यान रख्यें ज्यां।

एनएचएआई क अधिकारियौं न बोलि कि मार्च 2024 मार्च तक एक्सप्रेस वे थैं पूरू करणा क लक्ष्य च पर हमरि कोसिस च की यां से पैळि पूर कर्यें ज्यां।

ऐ मौका फर चीफ इंजीनियर लोक निर्माण विभाग अयाज अहमद, जिलाधिकारी देहरादून सोनिका, अपर सचिव विनीत कुमार अर एनएचएआई क अफसर छायीं।