मुख्यमंत्री न कायी ‘एक साल नई मिसाल’, विकास पुस्तिका‘ कु विमोचन

देरादूण। सरकार एक साला कु कार्यकाल पूरु हूंण पर आज देरादूण मा मुख्यमंत्री धामीन देरादूण मा सूचना एंव लोक सम्पर्क विभाग क छप्पी विकास पुस्तिका ‘एक साल नई मिसाल’ कु विमोचन कायी अर ग्राम तरला नागल मा 12.45 हेक्टेयर मा 37 करोड़ रुप्यौं से बणण वलि सिटी पार्क कु शिलान्यास कायी।

ऐ मौका फर मुख्यमंत्री न 16 घोषणा कर्यीं। जैमा भर्ति इमत्यानु देंण वळा परीक्षार्थियों खूंणि परिवहन योजना, जैमा भर्ति इमत्यान देंण वल नौन्याळु तैं उत्तराखण्ड मा आण-जाण खूंणि उत्तराखण्ड परिवहन क बस मा 50 प्रतिशत क छुट दियें जाली। कक्षा 06 बटि कम्प्यूटर अर सूचना प्रौद्योगिकी की शिक्षा दियें जाली। प्रदेसा सबि 13 जनपदु मा लैब ऑन व्हील्स चलती-फिरती प्रयोगशाला बण्यें जाली। उत्तराखण्ड राज्य साइंस टेक्नोलॉजी अर इन्फोर्मेशन टेक्नोलॉजी कॉरिडोर बण्यें जाला, याका दगड़ि प्रदेसा सरकार ऐ तोक मा जल्दी हि ‘‘साइंस अर टेक्नोलॉजी इनोवेशन पॉलिसी’’ ल्याली। हल्द्वानी गौलापार मा बण्यूं अन्तरराष्ट्रीय स्टेडियम थैं उच्चीकृत कैकि अन्तरराष्ट्रीय खेल विश्वविद्यालय बण्यें जालु। राज्य मा जिमदारु थैं मदत देंणा खूंणि मुख्यमंत्री औद्यौनिकीकरण योजना सुरू कर्ये जाली। राज्य मा गौर- भैंसा पलण वलों क मदत खूंणि मुख्यमंत्री राज्य पशुधन मिशन सुरु कर्यें जालु। प्रदेसा मा मुख्यमंत्री कौशल विकास अर रोजगार योजना सुरू कर्यें जाली। राज्य मा इन्न गौ जख 250 मवसा से जादा छन, वैं गौ थैं मुख्य सड़क से ज्वड़ा खूंणि मुख्यमंत्री ग्राम सड़क योजना सुरू कर्यें जाली।

दिवालीखाल बटि गैरसैंण तक सड़क चौड़ी कर्यें जाली। उत्तराखण्ड क लोक त्योवार उत्तरायणी, फूलदेई, हरेला, ईगास, बूढ़ी दिवळी थैं पछ्याण दिलौंणा खूंणि नीति बण्यें जाली।

मुख्यमंत्री न बोलि बल आजकु दिन कै मान्ने मा खास च। आज क दिन देवभूमि क रैवासियों क अपड़ि आस, उमेद थैं पूरु करणा खूंणि वलि सरकार कु एक साल कु पूरु हूंण च। आज हमरू उत्तराखण्ड ‘उत्कृष्ट उत्तराखण्ड’ बणण क बाटु पर चलणु च। मुख्यमंत्री न बोलि कि जब बि वु क्वीं फैसळा लिन्दन त उंकी आंखियौं मा प्रदेसा आखरि कुणा मा रैंण वळु मनखि रैन्द, उन्न बोलि या से उथैं फैसळा करण मा असानी हूंद। ळोगु क भरोसु ही हमरि प्रेरणा च, उंकु भरोसु थैं हमथैं औरि कटकुटु बणौंण प्वाड़ळु।

ऐ मौका फर कैबिनेट मंत्री सुबोध उनियाल, भाजपा क प्रदेश अध्यक्ष महेंद्र भट्ट, विधायक खजान दास, विनोद चमोली, उमेश शर्मा काऊ, मुख्य सचिव डॉ. एस.एस.संधु, सचिव शैलेश बगोली, सूचना महानिदेशक बंशीधर तिवारी छायीं।