देरादूण मा ह्वै ऐतिहासिक श्री झंडा जी कु आरोहण

देरादूण। देरादूण मा दरबार साहिब मा आज ऐतिहासिक श्री झंडा जी कु आरोहण ह्वैग्यें। आज सुबेर पुरणू झंडेजी थैं उतरण कु काम सुरु ह्वै। दोफरा मा द्वी बजि बटि चार बजि क बीच मा दरबार साहिब मा महंत देवेंद्र दास महाराज अगवै मा श्री झंडेजी कु आरोहण सुरु ह्वै। जैका बाद व्यखुनी दा 4 बजिक 10 मिनट पर झंडे जी कु आरोहण ह्वै। ऐ मौका फर सर्या दरबार साहि संगत क जयकारौंन गूंजी ग्यें।

ऐसु क साळ श्रीझंडे जी पर दर्शनी गिलाफ चढ़ौंणा कु मौका पंजाब क एक कुटुम्दरि थैं मिळि। कुटुम्दरि क तरफ बटि संसार सिंहन 30 साल पैळि अपड़ा सुख अर जस खूंणि श्री झंडेजी फर गिलाफ चढ़ौंणा क मन्नत मंगी छायीं।

श्रीझंडाजी कु म्यळा कु इतिहास देरादूण से जुड़यू च। श्री गुरु राम राय महाराज सन् 1676 मा देरादूण ऐ छायीं। रौंत्याला देरादूण मा उन्न अपड़ि करम भूमि बण्यें अर यखि डेरा जमै। जै से यखकु नौ डेरादून ह्वै जु बाद मा देहरादून ह्वैग्यें।

श्री गुरु महाराज न श्री दरबार साहिब में मनखियों के भलै का काम करनि अर देरादूण मा बौत बड़ु झण्डा लग्यें अर अपड़ा अनुयायी खूंणि ऐ ही झण्डा कु आशीर्वाद पौंणा खूंणि बोलि। तबि बटि झण्डा जी दर्शन क परम्परा सुरु ह्वै।

श्रीमहंत देवेंद्र दास महाराज न संगतों से बोलि कि जु मनखि गुरु बत्यां बाटा फर चलदन वै थैं जिन्दगि मा सबि धाणी मिल जान्दि। उन्न बोलि कि म्याळा हमर देसा पछ्याण छन। म्याळा देस विदेसा मनखियों थैं एक करदन अर अपड़ि कला संस्कृति अर संस्कारु कु आदान-प्रदान करदन।