सिंचै मंत्री सतपाल महाराजन कायी सिंचाई अर लघु सिंचाई विभागा समीक्षा बैठक अर बोलि रूड़ियों मा पाणिक क्वीं दिकदारि नी हूंण चैंद

देरादूण। सिचैं विभागा क टुटी नहरु थैं ठीक करणा खूंणि पैसौं कु बन्दुबस्त कैकि नहरु मा पाणि चल्यें जाणा क कार्ययोजना त्यार कर्यें ज्या। जै से
रूड़ियों मा पाणिक क्वीं दिकदारि नी हूंण चैंद। या बात सिंचै मंत्री सतपाल महाराजन सिंचाई अर लघु सिंचाई विभागा समीक्षा बैठक मा बोलि।

सिंचै मंत्री सतपाल महाराजन बोलि कि पाड़ मा जख पाणि क स्त्रोत अर गदेरा छन वख पाणि जमा करणा खूंणि पाणिक डिग्गी बण्यें ज्यां, जै से रूड़ि मा पाणि क कमी पुरी कर्यें ज्यां।

सिंचै मंत्री सतपाल महाराजन अधिकारियों थैं निर्देश दीं कि रुद्रप्रयाग जनपद मा लस्त नहर बणौंणा खूंणि नै डीपीआर पर काम कर्यें ज्या।
सिंचै मंत्री न बोलि कि जमरानी अर सांग बांध परियोजना क केन्द्र सरकार बटि मिलि मंजूर पर कारवै करयें ज्यां। उन्न या खूंणि खास अधिकारी भर्ति करणा खूंण निर्देश दीं।

सिंचै मंत्री न रामनगर मा भरतपुरी-पम्पापुरी बाढ़ योजना थैं झट मंजूरि दियें जाणा क बारा मा कारवै करणा खूंणि बोलि अर फूल ताल बटि आण वळु पाणि तैं सीधा गदना मा ज्वड़णा खूंणि परीक्षण करणा खूंणि बोलि।।

महाराजन सतपुली अर स्यूंसी मा झील बणौंणा खूंणि दुबरा डीपीआर त्यार करणा खूंणि अर झीळ बणौंणा खूंणि अप्रैल तक पैंसा दियें जाणा क बारा मा बोलि।

समीक्षा बैठक मा संयुक्त सचिव जे.एल. शर्मा, सिंचाई विभागा प्रमुख अभियंता जयपाल, लघु सिंचाई विभाग क एचओडी बी.के तिवारी, पुनीत कुमार मल्ल, राजीव रंजन, आर.के. गुप्ता, आर. के. तिवारी, संजीव कुमार श्रीवास्तव, प्रशांत बिश्नोई, नवीन, सुभाष चंद्रा, डीसी सनवाल, पी.के. सिंह अर सिंचाई, लघु सिंचाई विभागा अधिकारी छायीं।