पंचैतु मा क्वीं बि घपळा नीं हूंण चैंद : सतपाल महाराज

देरादूण। पंचायती राज मंत्री सतपाल महाराजन आज पंचायती राज निदेशालय मा विभागीय समीक्षा बैठक कायी।

महाराजन कड़ा शब्दु मा निर्देश दे कि त्रिस्तरीय पंचैतु मा क्वीं बि घपळा नीं हूंण चैंद। उन्न बोलि कि जख बटि बि घपळा क शिकैत मिलाळि उन्नि एफआईआर दर्ज कर्यें जाली।

महाराजन बोलि कि कै बि अधिकारी मा क्वीं बि पटल 3 साळ से जादा नी रैंण चैंद अर जै बि जिला अधिकारियों अर कर्मचारियौं मा द्वी पटळु कु काम च त बत्यें ज्यां। महारान जनपदु मा काम करण वळा डाटा एण्ट्री ऑपरेटर, ब्लॉक कॉडिनेटरा पदु मा जतगा बि ऑउट सोर्स बटि काम करणा वळा कर्मचारी छन उंकु मानदेय का बारा मा सूचना देंणा क निर्देश दीं।

महाराजन अधिकारियों तैं बोलि कि ऐसु क साल बरखा कम ह्वै, जै से गौ मा पाणि क कमि ह्वै सकदन, इल्लै या से निपटणा खूंणि जनपदु मा सबि अधिकारियौं तैं सचेत रैंणा खूंणि अर पाणि के कमी पूरी करणा खूंणि जल जीवन मिशना अधिकारियों क दगड़ मा बैठक करणा खूंणि बोलि।

महाराजन बोलि कि गौ मा रैवासियों क कमै बढ़ौंणा खूंणि, इन्न धार्मिक जगों मा जख जातरि आंदन वख होम स्टे बण्यें जाण चैंदन।

पंचायती राज मंत्री महाराजन ब पंचैतु मा बण्यें जाणा वळा पंचैत भवनु मा बिजली, पाणि इंटरनेट का दगड़ा-दगड़ि भारतीय अर पश्चिमी देसु क जनि शौचालय बणौंणा क बि निर्देश दीं।

बैठक मा पंचायतीराज विभागा अपर सचिव ओमकार सिंह, संयुक्त सचिव डी.एस. राणा, निदेशक आनन्द स्वरूप, संयुक्त निदेशक राजीव कुमार नाथ त्रिपाठी, उप निदेशक मनोज कुमार तिवारी छायीं।