औंण वळि चारधाम जातरा पर्यटन उद्योग तैं नै ऊंचै मा लिजाळि: सतपाल महाराज

टूरिज्म सर्वे अवार्ड मा मुंस्यारी तें मिलि बेस्ट माउंटेन डेस्टिनेशन कु अवार्ड

नै दिल्ली। अंतराष्ट्रीय योग दिवस अर ऐसु क साळ औंण वळि चारधाम जातरा पर्यटन उद्योग तैं नै ऊंचै मा लिजाळि या बात पर्यटन मंत्री सतपाल महाराजन नै दिल्ली मा उर्यूं पर्यटन शिखर सम्मेलन मा बोलि। सतपाल महाराजन टूरिज्म सर्वे अवार्ड मा मुंस्यारी तें बेस्ट माउंटेन डेस्टिनेशन अवार्ड मिलण पर खुसी जतै अर बोलि कि यु सम्मान प्रदेसा पर्यटन खूंणि राज्य सरकार क भवैष्य क सोच अर उत्तराखण्ड तैं अग्वानया (अग्रणी) कु प्रदेसा बणौंणा मा लग्यां प्रदेसा रैवासियों तैं च।

पर्यटन मंत्री महाराजन बतै कि औंण वलि चारधाम जातरा खूंणि मंगळबार बटि पंजीकरण सुरु ह्वै अर अबि तक 1 लाख से जादा श्रद्धाळुऔं न पंजीकरण कै याली। उन्न बतै कि ऐसु क साळ हमन चार तरौं पंजीकरण कु बन्दबस्त कर्यूं च। श्रद्धाळु जन ऑनलैन, ऐप, फोन फर अर व्हाट्सएप पर अपडु पंजीकरण कै सकदन। महाराजन बोलि कि 3 दिन मा इतगा पंजीकरण हूंणू एक रिकोर्ड च। अर हम या उमैद करणा छन कि ऐसु क साळा चारधाम जातरा पिछळा साळु कु सबि रिकोर्ड तैं तोड़ि देळी।

महाराजन बोलि कि चारधाम जातरा मा श्रद्धाळुऔं खूंणि लटरंग-पटरंग (सामान) जु बि दरकार च वांकी हमन त्यारि कै याळी। उन्न बोलि कि डॉक्टर, दवै अर जातरी क सुविधौं खूंणि धाम मा जु बि दरकार होलि अर धाम का चलणा सबि काम जातरा से पैळि पूरा ह्वै जाळा।

महाराजन बोलि कि प्रदेस सरकारन जातरा मा औंण वळा जातरियौं खूंणि शैव, शाक्त, वैष्णव, नवग्रह, गोल्जू, नरसिंह, गुरुद्वारा, हनुमान, नाग देवता, स्वामी विवेकानंद जनि धार्मिक सर्किटों तैं बि बण्यें याली। जातरि यु धार्मिक जगो जैकि पूजा पाठ कै सकदन।

महाराज बोलि कि आण वळु योग महोत्सव खूंणि भि हमन सर्या त्यारि कै याली। प्रदेस मा 1 मार्च बटि 7 मार्च, 2023 तक योग अर आध्यात्मिककता कु अंतरराष्ट्रीय राजधानी ऋषिकेश मा अंतर्राष्ट्रीय योग महोत्सव 2023 उर्यें जाळु।

पर्यटन मंत्री सतपाल महाराजन बोलि कि खरसाली मा यमुनोत्री धाम तक बणण वळु रोप-वे मां यमुना क रूड़ि अर ह्यूंद क द्विया घामु तैं एक दगड़ मा जोड़ि देळु अर उत्तराखण्ड मा धार्मिक पर्यटन कु नै अध्याय सुरु करणा कु काम कराळु। उन्न बोलि कि रोपवे बणण से जातरी उत्तराखण्डा रौंत्याला पाडु़ तैं औरि नजीक बटि द्याख्ला। अर प्रदेस मा रोजगार कु साधन बि बढ़ळु।

नई दिल्ली मा उर्यूं पर्यटन शिखर सम्मेलन अर पुरस्कार समारोह मा केंद्रीय संस्कृति राज्य मंत्री भारत सरकार अर्जुन राम मेघवाल अर प्रदेश क पर्यटन मंत्री सतपाल महाराज क अळौ हिमाचल प्रदेसा उद्योग मंत्री हर्षवर्द्धन चौहान, पर्यटन सचिव अरविंद सिंह, छायीं।