चारधाम जातरा : जातरा से पैळि सबि विभागा अपड़ि त्यारि पूरि कैरि दियां: मुख्यमंत्री

देरादूण। मुख्यमंत्री धामीन आज सचिवालय मा चारधाम जातरा क त्यारि क समीक्षा बैठक कायी। मुख्यमंत्री अधिकारियों तैं निर्देश दी कि चारधाम जातरा सुरु हूंणि से पैळि सबि विभागा अपड़ि त्यारि पूरि कैरि दियां।

मुख्यमंत्री न बोलि कि बदरीनाथ जातरा मा बीआरओ कु एक टोळा (दल) जोशीमठ मा राळु। मुख्यमंत्री न बोलि कि जन्नि सड़कि मा क्वीं भि दिकदारि हूंद उन्नि ठीक कर्यें जाली। उन्न बोलि कि जोशीमठ मा आपदा कंट्रोल रूम बण्यें जालु।

मुख्यमंत्री न लोनिवि तैं निर्देश दीं की सड़कियौं मा खडवळा नीं हूंण चैंदन। उन्न बोलि कि प्रमुख लोनिवि हफ्ता मा एक दिन जिलाधिकारी अर विभागा अधिकारियों क दगड़ बैठक काराळा। उन्न निर्देश दी कि चारधाम जातरा मा गाड़ियों क खड़ी हूंणा जगा कु बन्दबस्त अर डैरबर खूंणि अराम करणा कु बन्दबस्त बि कर्ये ज्या।

मुख्यमंत्री न बोलि कि चारधाम जतरा मा सफै कु साख ध्यान धर्यें ज्या। मुख्यमंत्री न बोलि चारधाम मा जु बि मन्दिर अर धार्मिक जगा छन उंकु खुब प्रचार कर्यें ज्या, जै से जातरि उं बि दर्शन कैरि सक्यां।

मुख्यमंत्री न बोलि प्रधानमंत्री न जातरियों से विनति कायी कि जातरा मा 5 प्रतिशत खरचा प्रदेसा उत्पादु तैं मूल्यांण मा खरच कर्या। यां से प्रदेसा उत्पादु तैं फैदा मिलळु। मुख्यमंत्री बोलि कि या ई दिसा मा कोसिस कर्यें ज्या।

बैठक मा कैबिनेट मंत्री सतपाल महाराज, प्रेम चंद अग्रवाल, चंदन राम दास, बदरीनाथ-केदारनाथ मंदिर समिति का अध्यक्ष अजेन्द्र अजय, विधायक भरत चौधरी, श्रीमती शैला रानी रावत, दुर्गेश्वर लाल, मुख्य सचिव डॉ. एस.एस. संधु, अपर मुख्य सचिव श्रीमती राधा रतूड़ी बि छायीं