प्लास्टिका कु कबाड़ तैं दुबरा खप्यौंणा खूंणि नै तकनीका दरकार च : मुख्यमंत्री धामी

देरादूण। मुख्यमंत्री धामीन आज देरादूण मा उत्तराखण्ड प्रदूषण नियंत्रण बोर्ड कु उर्यूं ‘प्लास्टिक वेस्ट मैनेजमेंट’ कार्यशाला मा भाग ल्यें अर प्रदेसा वेस्ट टू एनर्जी प्लांट, काशीपुर कु वर्चुअली लोकार्पण कायी।

मुख्यमंत्री धामी न बोलि कि आज घारु, होटळु , दुकनियौं, फैक्टरियौं बटि निकळण वळु प्लास्टिक वेस्ट हम खूंणि बौत बडी़ समस्या बणिग्यें। उन्न बोलि कि ईं समस्या तैं खतम करणा खूंणि हमथैं प्लास्टिका कु कबाड़ तैं दुबरा खप्यौंणा खूंणि नै तकनीक क दरकार च।

मुख्यमंत्री न बोलि कि उत्तराखण्ड प्रदूषण नियंत्रण बोर्डा कु प्लास्टिक बणौंणा मा उद्योग/ इकाई क जरिया EPR रजिस्ट्रेशन क बारा मा उत्तर भारत अग्वान्या (अग्रणी) कु राज्य च। जु कि हम सब्यौं खूंणि मतंगा बात च। उन्न बोलि कि बगत ऐग्यें कि अर अब हमथैं उत्तराखण्ड मा वेस्ट टू वैल्थ अर वेस्ट टू एनर्जी क दिसा मा काम करणा क तरफौं जाण प्वाड़ळु। अबि सर्कुलर इकोनॉमी कु कॉन्सेप्ट ऐग्यें जु कार्बन उत्सर्जन तैं कम करणा क दिसा मा मदतगार होळु। उन्न बोलि कि कुड़ा कबाड़ तैं कबाड़ नी समझण चैंद। कबाड तैं हमथै कामकि चीज तरौं देय्खण चैंद। उन्न बोलि कि कबाडा न कतगै मनखियों तैं रोजगार मिळदु। मुख्यमंत्री न बोलि कि आज देस मा कतर्ग स्टार्ट अप ई दिसा मा नै तकनीक क दगड़ मा समणि आणा छन। उन्न बोलि कि हमथैं पर्यावरण तैं बचौंणा खूंणि अपड़ि जिन्दगि बदलाव कैकि सर्या दुन्या तैं रैबार दिंण प्वाड़ळु कि हमरु देस अर प्रदेस क रैवासी पर्यावरण तैं बचौंणा खूंणि सदिन त्यार रैंदन।

ऐ मौका फर प्रमुख सचिव वन अर पर्यावरण आर.के सुधांशु, निदेशक पर्यावरण एस. पी सुबुद्धि, प्रदूषण नियंत्रण बोर्ड क सदस्य सचिव सुशांत पटनायक, संयुक्त निदेशक पर्यावरण नितेश मणि छायीं।