भर्ति इमत्यान मा एखारि-एखारि घपरोळ किलै हूंणू च : हाईकोर्ट नैनीताल

नैनीताल। उत्तराखण्ड मा पेपर लीक मामळा कु उमाल कम हूंणा कु नौ नीं लिंणु च। बेरोजगार पेपर लीक मामळा क जांच सीबीआई से करौंणा क मांग करणा छन। अब यु मामळु हाईकोर्ट मा बि पौंचिग्यें। आज हाईकोर्ट मा पेपर लीक मामळा क जांच सीबीआई से करौंणा क मामळा मा सूण्यें ह्वै। हाई कोर्टन राज्य सरकार, सीबीआई अर डीजीपी थैं नोटिस दे। अर 11 जुलै तक जवाब देंणा खूंणि बोलि। हाईकोर्ट न बोलि कि प्रदेस मा एखारि-एखारि (बार-बार) इमत्यानू मा घपरोळ किलै हूंणू च?
बतै दियां कि देरादूण क रैवासी विकेष सिंह नेगी न नैनीताल हाईकोट मा एक जनहित याचिका दायर कै। जैमा उन्न बोलि कि उत्तराखण्ड मा बेरोजगार पेपर लीक क मामळौं क जांच सीबीआई से करौंणा क मांग तै लेकैकि सड़कियौं मा छन अर पुलिस उ फर लांठु चलौंणि च। ऐ मामळु मा सरकार चुप च अर सरकार पेपर लीक करण वळौं फर क्वीं सखत कारवै नी करणि च।

याचिकाकर्ता न बोलि कि अब पुलिस अर एसटीएफ पर भरोसु नी च। उन्न बोलि कि यूकेएसएसएसीसी न वीडीसी अर यूकेपीएससी पटवारी क भर्ति कर्यें छायीं अर द्वियां भर्ति इमत्यान कु परचा लीक ह्वैग्यें।
याचिकाकर्ता न बोलि कि हिमालच प्रदेस न भर्ति इमत्यान मा घपरौळ क जांच सीबीआई से करें अर उत्तराखण्ड सरकार ऐ मामळों मा जांच सीबीआई से करौंणा मा डरणि च।
उन्न विनति कायी कि एक मामळु मा सीबीआई जांच करयें ज्यां।

आज ऐ मामळु मा मुख्य न्यायाधीश विपिन सांघी व न्यायमूर्ति आलोक कुमार वर्मा क खण्डपीठ न सूण्यें कायी। अर सूण्यें खूंणि अगळि तारिख 11 जुलै खंूणि तय कायी।