नकल विरोध कानून आखिर कै खूंणि च ?

प्रदेस मा भर्ति इमत्यानु मा हूंण वळु घपरोळ अर पेपर लीक तैं लेकैकि बेरोजगार संघ सरकारक खिलाफ ज्वा लड़ैं अर जु मांग कर्यीं च वा रंग ल्यायी। प्रदेस सरकारन भर्ति इमत्यानु मा पारदर्शिता अर शुचिता खूंणि उत्तराखण्ड परीक्षा अध्यादेश 2023 लागू कै दे।

ऐ अध्यादेश मा इमत्यान मा परचौं क छपै मा, परीक्षाफल मा घपरोळ करणवळों तैं 10 करोड़ रुप्यौं अर जादा से जादा जिन्दगि भरा जेल च अर इनि कमै से जमा कर्या रुप्यौं तैं जब्त कर्यें जाणा कु प्रावधान च। भर्ति इमत्यान मा जु बि नकल करदा पकड़े जाळु वैथैं तीन साळ क सजा अर 5 लाख रुप्यौं क डांड (जुर्माना) च। यांका बाद दुबरा नकल करदा पकड़े जाण फर 10 साळा सजा अर 10 लाख रुप्यौं कु डांड कु प्रावधान कर्यें ग्यें।

उत्तराखण्ड सरकार कु बण्यूं नकल विरोधी कानून कु बेरोजगार हि ना सर्या प्रदेस मा चौछ्ड़ि गुणगान हूंणा छन।

त दूसर तरफ नकल विरोधी कानून पर सवाल बि खड़ा हूंणा छन। सवाल छन कि क्या नकल विरोधी कानून बणौंणा से भर्ति इमत्यान मा नकल माफिया तैं रक्वें जै सकदु, या भर्ति इमत्यान मा अब क्वीं घपरोळ नी होळु?

अब जब 12 फरवरी 2023 खूंणि ह्वीं लोकपाल पटवारी भर्ति इमत्यानु मा प्रदेसा कु पैळु नकल विरोधी कानून कु केस दर्ज ह्वै। अर यु सवाल भि खडु ह्वैग्यें कि नकल विरोध कानून आखिर कै खूंणि च? किलैकि नकल विरोध कानून कु पैळि केस नकल माफिया फर नी ह्वै बल केस परचा क सील टुट्णा क सिकैत करण वळा अभ्यर्थी जु इमत्यान दिंणु छायीं वै पर अर एक न्यूज पोर्टल पर दर्ज ह्वै जै न या खबर दिखें छायीं।

यखम बडु़ सवाल यौं च कि सिकैत करणु कब बटि नकल करणा क श्रेणी मा ऐग्यें? अर खबर दिखौंणु नकल विरोधी कानून कु उल्लंघन कब बटि ह्वैग्ये ? आखिर यांकु जवाब कु देळु? इमत्यान देंण वळा त इमत्यानु मा कुछ न कुछ सिकैत- कबि परचा क छपै, कबि गलत सवाल, कबि सवाल कु उत्तर परचा म सै नी च जनि त करदा हि छन अर उंकी दिकदरि कु हल वखम कर्यें जान्दन। सिकैत करणु क मतबल, नकल त कतै नी ह्वै सकदु।

अब इन्न मा सिकैत करणवळा फर हि केस दर्ज करणु क्या नकल माफियौं कु हिकमत तैं औरि बढ़ौंणु वळु नीं च। इन्न मा नकल विरोधि कानून कैकी मदत करणु च अर यु कानून कै खूंणि बण्यें ग्यें या स्वचण वळि बात च। परचैं सील टूटण क सिकैत पर मुकदमा दर्ज करण से नकल रुकि जैळी या त मसखरा (मजाकिया) बात नी च त क्या च। भर्ति घपरोळ मा जु आरोपि छन अर जौ फर ईनाम च वु पुलिसा पकड़ से भैर छन अर जु भर्ति घपरोळु तैं समणि ल्याणा छन या भर्ति इमत्यान ह्वै घपरोळा क जांच करणा क मांग करणा छन उ फर केस दर्ज कर्यें जाणा छन यु कख कु निसाब च? यखम स्वचण वळि बात च कि परचा लीक क अवाज उठौंण वळों अर भर्ति इमत्यानु क जांच करण क मांग करण वळौं पर नकल विरोधी कानून क नौ पर केस दर्ज कैकि हम कैकु भळु करणा छा। इन्न मा साफ च कि इन्नु नकल विरोधी कानून अबि त नकल माफियौं क मदत हि ना उंकी हिकमत तैं औरि बढ़ौंणा कु काम हि करणु च औरि कुछ न।