मुख्यमंत्री न कायी गढ़वळि पिक्चर ‘यु कनु रिस्ता’ कु टीजर लांच

देरादूण। मुख्यमंत्री धामीन आज बुधबार खूंणि मुख्यमंत्री कैम्प कार्यालय मा गढ़वळि पिक्चर ‘यु कनु रिस्ता’ कु टीजर लांच कायी। या फिलम 17 फरवरी खूंणि सिल्वर सिटी माॅल देरादूण मा रिलीज हूंणि च।

मुख्यमंत्री न उमेद जतै कि फिलम उत्तराखण्डा संस्कृति, खाणु पीणु, हमरि पछ्याण तैं सर्या देस अर दुन्या मा पौंचाणा कु काम कराळि। मुख्यमंत्री न फिलमा सुफळ हूंणा क कामना कायी अर सर्या फिलमा बणौंण वळा टोळा तैं बधै दे।

फिलम बणौंणा वळा अंति लक्की कंडियाल न बोल कि डाॅ. निशंक जी कु उपन्यास ‘छूट गया पड़ाव’ पर बणि फिलम एक मास्टरणि क अपड़ि स्कुळया नौनि कु इलाज खूंणि खैरि (संघर्ष) अर देसा केर पर सहीद कुटुम्दरि क कहानी पर च।

ऐ मौका फर फिलम बणौंणा वळा अंकित लक्की कंडियाल, डॉ. बेचैन कंडियाल, निर्देशक गणेश वीरान, अभिनेता राजेश मालगुड़ी, फिलमा कलाकार राजेश नौगांई, दिव्यांशी कुमोला, संजय चमोली, हिमालय विरासत न्यासा अध्यक्ष आश्ना नेगी वखम छायीं।