बाॅबी पंवार अर वैका दगड़्यौं तैं मिळिग्ये जमानत

देरादूण। सीजेएम कोर्ट न आज बुधबार खूंणि बाॅबी पंवार अर वैका दगड़्यौं तैं जमानत दे याली। आज सीजीएम कोर्ट मा बाॅबी पंवार क जमानत पर अभियोजन अर बचाव पक्ष क बीच मा बौत कचोर (बहस) ह्वै।

अभियोन पक्षान अदालत मा घैल अधिकारियौं क डाॅक्टरी रिपोर्ट बि दे। जै फर बचाव पक्षा न बोलि कि जब यिं अधिकारी घैल छायीं, तब यिं ड्यूटी कनकैकि करणा छन। जैका बाद 6 आरोपियों क जमानत खूंणि अदालत मा खुब कचोर ह्वै।

पुलिसन जमानत कु विरोध कायी अर पुलिस अफसरु तैं अस्पताल मा भर्ति बतै कि मुकदमा मा आईपीसी क धारा 307 शामिल करणा क मांग कायी, जैकु बचाव पक्ष न विरोध कायी। पुलिसन अदालत मा बाॅबी पंवार अर वैका दगड़यौं फर पुलिस पर ढुंगा चुलौंणा कु अर उपद्रव करणा कु आरोप लग्यूं छायीं। सीजेएम कोर्ट मा बाॅबी पंवार अर वैका दगड़ सब्यौं पर पुलिस पर (जान से मरणा खूंणि) हमळा करणा क लग्यीं धारा तैं खतम करणा क मांग पर बौत कचोर (बहस) ह्वै।

बचाव पक्ष वकील मनमोहन कण्डवाल न बतै कि कोर्टन सुण्यें का बाद धारा 307 तैं हटौंणा क निर्देश दी अर जमानत तैं मंजूर कै दे।

बतै दियां कि उत्तराखण्ड बेरोजगार संघा क 13 लोगु तैं पुलिसान गिरफ्तार कर्यूं छायीं। जैमा बटि 6 की जमानत छंचर खूंणि ह्वैग्यें छायीं अर बाॅबी पंवार अर वैका 7 दगड़यौं तैं आज कोर्ट बटि जमानत मिळिग्यें।