सरकार बेरोजगारु क भलै खूंणि सदनि त्यार च : राधा रतूड़ी

देरादूण। अपर मुख्य सचिव राधा रतूड़ी न आज मंगलबार खूंणि सचिवालय मा मीडिया तैं बतै प्रदेस सरकार आन्दोलन करण वळा नौन्याळु क दगड़ मा च अर उंकी सबि बात हमन मानि याली अर औरि दिकदरि कु हल करणा क कोसिस करणि च।

राज्य सरकान बोलि कि सरकार बेरोजगारौं क भलै खूंणि सदनि अगनै बढ़िकि बात करणा खूंणि त्यार च। बेरोजगार संघा क ज्वा बड़ी मांग छायीं नकल विरोधी कानूनन तैं कटकुटु बण्यें ज्यां। त राज्य सरकारन उंकी मांग फर कटकुट फैसळा ल्यें अर प्रदेस मा सखत नकल विरोधी कानून लागू कै दे।

अपर मुख्य सचिव राधा रतूड़ी न या बात बि साफ कै कि यु कानूनन राज्य सरकार क सरकारि भर्ति खूंणि हूंण वळा इमत्यानु मा हि लागू होळु। स्कुळयां अर डिग्री काॅलेज क इमत्यानु मा नकल विरोधी कानून लागू नीं होळु।

अपर मुख्य सचिव राधा रतूड़ी न बोलि बेरोजगार संघा क तरफ बटि यूकेएसएसएसी अर लोक सेवा आयोग क इमत्यानु मा ह्वीं गड़बडि क मामळु मा एसआईटी अर एसटीएफ क जांच तैं उच्च न्यायालय क न्यायधीश से करौंणा क मांग कर्यें ग्यें छायीं जै फर प्रदेस सरकारन अपड़ि मंजूरी दे याळी। लोक सेवा आयोग क परीक्षा नियंत्रक तैं बि हट्यें याली, वुकी जगा नै अधिकारी तैं दियेग्यें। उन्न बोलि कि बेरोजगार संघा क जु बि मुद्दा सरकार क समणि धैरि, उ सब्यौं कु हल कर्यें ग्यें।

अपर मुख्य सचिव राधा रतूड़ी न बोलि सरकार कु बण्यूं नकल विरोधी कानून देस कु सबसे सखत कानून च। राज्य सरकार क उद्देश्य ज्वानु क भवैष्य क दगड़ मा खिलवाड़ करण वळों पर कड़ी करवै करणा क च। उन्न बोलि कि छात्रौं तैं बखौंण वळा अर गलत प्रचार करण वळों फर बि कारवै कर्यें जाळी।

अपर मुख्य सचिव बतै कि 12 फरवरी खूंणि उर्यीं राजस्व उप निरीक्षक (पटवारी लेखपाल) क इमत्यानु प्रदेसा 13 जनपदौं क 498 परीक्षा केन्द्रौं मा इमत्यान बिना घपरोळा टुप्प (शान्तिपूर्ण) उर्यें ग्यीं। इस मौका फर सचिव शैलेश बगौली, एडीजी (लॉ एण्ड ऑर्डर) वी. मुरूगेशन अर अपर सचिव जगदीश प्रसाद काण्डपाल छायीं।