आयोग पर बटि भरोसु उठिग्यें : बाॅबी पंवार

देरादूण। उत्तराखण्ड बेरोजगार संघा झण्डा ताल बेरोजगारु न आज प्रदर्शन अर सत्याग्रह कायी। ऐ मौका फर बेराजगारु न सरकार अर उत्तराखण्ड लोक सेवा आयोगा काम करणा कु तरीकौं पर बि सवाल खड़ करिन। बेरोजगारु न सरकार खिलाफ खुब नारा बाजी कायी अर सबि भर्तियौं क सीबीआई से जांच करौंणा क मांग, पटवारी भर्ति इमत्यान मा जौन नकल कायी ऊंका नौ बतौंणा क मांग कायी।

उत्तराखण्ड बेरोजगार संघा अध्यक्ष बाॅबी पंवारन बोलि राज्य बणणा क बाद प्रदेस मा जतगा बि भर्ति ह्वै सब्यौं मा घपरोळ ह्वै। उन्न बोलि कि पटवारी अर एई-जेई क दगड़ उत्तराखण्ड लोक सेवा आयोग बटि जगता बि भर्ति ह्वीं सब्यौं क जांच सीबीआई से हूंण चैंद। बाॅबी पवार न बोलि कि अब सरकार अर आयोग पर बटि भरोसु उठिग्यें। आज बेरोजगार ज्वान अप्फु तैं ठग्यु समझणा छन। उन्न बोलि कि सरकार नकल विरोधी काननू बणौंणा क बात करणि च पर अबि तक क्वीं काननू नी बण्यें साकी।

बाॅबी पंवार न बोलि कि सरकार फरवरी मैना मा पटवारी भर्ति अर यूकेपीसीएस मेंस क इमत्यान करौंणि च, जबकि द्विया इमत्यानु क पेपर लीक हूंण क मामळु मा जांच हूंणि च। उन्न बोलि कि दुबरा इमत्यान मा घरपोळ हूंद त क्या तिसर बार इमत्यान ह्वाळु?

बेरोजगार संघ न अपडि नराजगी दिख्यें अर बोलि कि प्रदेस क ज्वानु तैं सरकार अर आयोगौं पर बटि भरोसु उठिग्यें। ऐ भरोसु तैं दुबरा पाणा खूंणि सरकार थैं भर्ति मा हूयां घपरोळौं क जांच करण चैंद अर यांक बाद हि भर्ति इमत्यान करौंण चैंद। उन्न बोलि कि अब सरकार अपड़ि तागत दिखौंणि च। अबि आयोगा द्वी अधिकारी जेल मा छन अर उंका मत्थी जु परीक्षा नियंत्रक छायीं वु अब 12 फरवरी खूंणि इमत्यान करौंणा क त्यारि मा लग्यां छन।

बेरोजगार संघा न या मांग कायी कि जब तक भर्ति इमत्यानु क जांच नीं ह्वै जान्दि क्वीं भर्ति इमत्यान नीं कर्यें ज्यां।