घौ (नासूर) बणिग्यें पेपर लीक क दिकादरि

पटवारी भर्ति पेपर लीक मामलु क बाद उत्तराखण्ड लोक सेवा आयोग पर बि सवाल खड़ा हूंणा छन। पटवारी इमत्यान ही न बल्कि यां से पैल्यक हूयां इमत्यानु पर घपरोळ कु शक च हूंणू छायीं। या बात जेई, ऐई क इमत्यान कु भि पेपर लीक हूंणा क बाद सै साबित ह्वैग्यें कि उत्तराखण्ड लोक सेवा आयोग कि अबि तकाकि कर्यां इमत्यानु मा भि उन्नि घपरोळ ह्वै जनि अधीनस्थ चयन आयोग मा ह्वै।

उत्तराखण्ड बेरोजगार संघ बि लोक सेवा आयोग पर सवाल खड़ा करणु च अर ब्वन च कि आयोग कु यु दावा गलत च कि चतुर्वेदी थैं पैलि बार गोपन विभागा जिम्मेबरि दियेंग्ये अर या से पैल्यक इमत्यान मा घपरोळ हूंणा कु क्वीं सवाल हि पैदा नी हूंद। उत्तराखण्ड बेरोजगार संघ बोलि कि सच यो च कि आयोग क भितर कतगै चतुर्वेदी छन।

यूकेएसएसएससी क इमत्यान मा पेपर लीक हूंणा क बाद सरकारन भर्ति इमत्यानु तैं उत्तराखण्ड लोक सेवा आयोग बटि करौंणा कु फैसळा ल्यें अर बोलि कि लोक सेवा आयोग कु इमत्यानु मा घपरोळ हूंणा कु क्वीं सवाल हि नी च पर लेखपाल पटवारी कु इमत्यान मा पेपर लीक हूंणा क बाद सरकारि दावौं क गेड़ खुळिग्यें अर लोक सेवा आयोग उत्तराखण्डा कु भरोसु पर बि सवाल खड़ा ह्वैग्यीं। यांका बाद बि उत्तराखण्ड लोक सेवा आयोग न यु दावा कायी कि पटवारी भर्ति मा घपरोळ पैळु मामलु च। तबि जेई, ऐई इमत्यान कु पेपर लीक हूंण क मामला समणि ऐग्यें तब लोक सेवा आयोग उत्तराण्ड क दावा बथौं मा उड़िग्यीं अर या बात साफ ह्वैग्यें कि उत्तराखण्ड लोक सेवा आयोग क कर्यां इमत्यानु मा बि उन्नि घपरोळ ह्वै जन्नि अधीनस्थ चयन आयोग क इमत्यानु मा हूंणू छायीं।

इन्न मा अब बडु़ सवाल सरकार क समणि च कि अब भर्ति इमत्यान करौंणा क जिम्मेबरि कथैं दियें ज्यां?

भर्ति कु परचा लीक मामलु मा गोपन विभाग, राजनैतिक ळोग अर गिरोह सामिल छन, यान्न हम समझि सकदो कि युकां ज्लड़ा कतगा गैरा छन।

प्रदेस मा डाॅक्टर नकली, मास्टर नकली, भर्ति इमत्यानु मा घपरोळ कैकि नौकरि पर लग्यां अकामि (अयोग्य) ळोग हमरु सिस्टम तैं टोटु (खोखला) करणा छन। उथैं कानूना क क्वीं डैर नी च।

या प्रदेसा बेरोजगार ज्वानु क निखणि हि च। काबिल बेरोजगार कबि सीधी भर्ति क नौ फर त कबि पिछनै क द्वार बटि भर्ति नौ पर ठग्यणा छन अर पेपर लीकन कब तक ठग्यें जाणा राळा, आज कै मा भि यांकु क्वीं जवाब नी च। आज ज्वानु क हकु पर दिन दुप्हरा मा डाका प्वड़णु च। वुका भवैष्य कु मखौळ उड़यें जाणु च जु दिन रात मेनत कैकी भर्ति इमत्यानु क त्यारि करणा छन। आज प्रदेसा नौन्याळु खूंणि कि पेपर लीक बौत बडु घौ (जख्म) बणिग्यें या बौत झुरण वळि बात च।