सरकार तैं छ्वटा- म्वटा झटका लगि सकदन पर सरकारक ज्यू (दिल) साफ च: ऋतु खण्डुड़ी

देरादूण। सरकार तैं छ्वटा-म्वटा झटका लगि सकदन पर सरकारक ज्यू (दिल) साफ च। सरकार क्वीं बि गलत काम करण वळौं तैं नीं छ्वाड़ळि, जब ज्यू साफ हूंद त सर्यां चीज साफ ह्वै जन्दिन। या बात विधानसभा अध्यक्षान रामनगर मा बोलि।

आज अपडु तिन दिनकु दौरा फर विधानसभा अध्यक्षान ऋतु खण्डूड़ी कुमौं मा च। आज विधानसभा अध्यक्षान ऋतु खण्डूड़ी राम नगर मा बोलि कि कुमौं से मिथैं लग्यार (लगाव) च किलैकि यख म्यारू मामकोट च।

विधानसभा अध्यक्षान ऋतु खण्डूड़ी न केन्द्र अर राज्य सरकार क तरफ बटि चलणि जनकल्याणारी योजनौं क जाणकारि दे।

विधानसभा अध्यक्षा न बोलि कि लालढांग- चिल्लरखाल मोटर मार्ग तैं लेकैकि उन्न वादा कर्यूं छायीं। उन्न बोलि कि म्यारू पैळि काम च कि लालढांग- चिल्लरखाल क 12 किलोमीटर लम्बु बाटु बणौंणा कु च। यांका दगड़ा दगड़ि कंडी मार्ग बणौंण बि उंकु ध्यान मा च। उन्न बोलि कि जल्दी हि ऐ बाटा तैं बणौंणा खूंणि वु भारत सरकार क दगड़ मा बात कारळि अर आज न त भोळ यु वाटु जरूर बणि जाळु।

बतै दियां कि ऐ वाटु क बणण से गढ़वाल अर कुमौं क बीच क दूरी 80 किलोमीटर कम ह्वै जाली। 34 साळु बटि ऐ बाटा तैं बणौंणा क मांग हूंणि च फर अबि तक यु बाटु नी बणि साकी।