गढ़वळि मा सरस्वती वंदना, हरीश रावतन बोलि भौतै-भौते भल्यो लागो

देरादूण। राजकीय बालिका इंटर काॅलेज गोपेश्वरा कु एक वीडियो सोशल मीडिया मा खूब वायरल हूंण च।

वीडियो मा स्कुळयां नौनि मां सरस्वती क प्रार्थना अपड़ि भाषा गढ़वळि मा करणि छन। जु बि स्कुळयां नौनियौं क ऐ प्रार्थना तैं सूंणणू च वु नौनियौं कु गुणगान करणु च। स्कुळयां नौनियौं कु गुणणान करणा मा अब पैल्यक मुख्यमंत्री हरीश रावत कु नौ बि जुड़िग्यें। हरीश रावत न स्कुळयां नौनियु अर मास्टरु तैं बधै।

हरीश रावतन सोशल मीडिया मा पोस्ट लेखि अर मास्टरु अर स्कुळयां नौनियौं तैं बधै दे अर लेखि भौतै-भौते भल्यो लागो। भाषा तैं संविधान क अष्टम सूची सामिल हूंण दिसा मा एक औरि कदम।

बतै दियां बल गढ़वळि अर कुमौंनि भाषा तैं भाषा कु दर्जा दिलौंणा मांग त कतगै बार ह्वै अर हूंणि रैंदन पर या मांग कबि बि सर्यां उत्तराखण्डा क मांग नी बणि साकी अर सिरफ कुछ मनखियों क मांग ही रैग्यायीं।

गढ़वळि अर कुमौंनि पाड़ मा त खुब ब्वलें जांद पर जनि हम सैंण क तोक मा औन्दन त गढ़वळि अर कुमौंनि भाषा कखि हर्चीं जान्द। ल्यखण त बौत दूरा बात, नै जमानु गढ़वळि अर कुमौंनी ब्वन भि नी चान्दु। सैद ई उ कारण च कि हमर प्रदेसा भाषा गढ़वळि अर कुमौंनी तैं आठवीं अनुसूची अज्यौं तक जगा नी मिळि साकी।