होमस्टे अर होटळु क खाणु (भोजन) मा कण्डळी क भुज्जी अर क्वादा कि रवटि दियें जाण चैंद : सतपाल महाराज

टिरी। साळ 2023 तैं सर्या दुन्या मा अंतर्राष्ट्रीय म्वाटु नाज (मोटा अनाज) क क रुप मा मन्यें जाणु च। आज म्वाटु नाज क मांग बढ़िग्यें, म्वाटु नाज शरैळ खूंणि बौत अच्छु हूंद। इल्लै हमथैं होटळु अर होमस्टे मा म्वाटु नाजन बण्यूं खाणु बि देंण चैंद। या बात प्रदेसा पर्यटन, लोक निर्माण, सिंचाई, पंचायती राज, ग्रामीण निर्माण, जलागम, धर्मस्व एवं संस्कृति मंत्री सतपाल महाराज आज छंचर खूंणि उत्तरायणी भगीरथी विकास समिति टिरी मा होम स्टे हब तिवाड गौ मरोड मा गढ़वाल होम स्टे तैं सुरू करदा बोलि।

महाराजन तिवाड गौ मरोड तैं पर्यटन ग्राम’ घोषित कै अर बोलि कि जन्न पंजाब मा मुंगरि कु आटु क रवटि अर ळय्या (सरसों) कु साग खाणु मा खुब मन्यें जांद, इन्नि हमरि कण्डली क भुज्जी अर क्वादा कि रवटि थैं खाणु मा दियें जाण चैंद। महाराजन बोलि कि हमथैं होम स्टे अर होटळु मा चैंसू, बाड़ी, फाणू, क दगड़ मा वेस्टर्न फूड तैं खाणु मा बणौंण चैंद।

पर्यटन मंत्री सतपाल महाराज न बोलि कि मिथैं याकी खुसी हूंणि च कि पर्यटन विभागा जरिया तिवाड़ गौ मा 15 होमस्टेट पंजीकृत छन।

पर्यटन मंत्री न बोलि कि पिछळ साळ टिरी झील मा मोटर बोट मूल्यौंणा खूंणि पर्यटन विभागान 28 ळोगु तैं मदत दे। जैमा तिवाड गौ का 8 ळोग छन।

ऐ मौका फर प्रतापनगर विधायक विक्रम सिंह नेगी, पैल्यक ब्लाक प्रमुख खेम सिंह चौहान, पैल्यक राज्य मंत्री अतर सिंह तोमर, भाजपा जिला उपाध्यक्ष परमवीर पंवार, जिला महामंत्री पवन शाह, राजेंद्र सिंह नेगी, कांडी खाला भाजपा मंडल अध्यक्ष ऋषि राम भट्ट, ग्रामीण समिति क अध्यक्ष कुलदीप पंवार, भाजपा मंडल अध्यक्ष रमेश रतूड़ी, ग्राम प्रधान तिवाडगांव संगीता देवी दगड़ मा बौत सर्या ळोग छायीं।