टिहरी बांध पुनर्वास, बगत पर सरकरि मदत नीं मिलण पर सिचैं मंत्री महाराजन अधिकारियौं तैं खुब झपोड़ि

टिरी। दुसर जगा मा बस्यें जाण वळों तैं सरकारक तरफ बटि दियें जाण वळि रुप्यौं क मदत बगत पर नीं मिलण से सिचैं मंत्री सतपाल महाराजन बैठक मा अधिकारियौं तैं खुब झपोड़ि (डांट) दे। महाराजन बोलि कि बांध विस्थापितौं क कारण हि सर्या देस तैं बिजली मिलणि च। इल्लै हमथैं उंकी सबि दिकदरियों कु हल करण प्वाड़ळु। या बात प्रदेस के सिचैं, पंचायती राज, पर्यटन, लोक निर्माण, ग्रामीण निर्माण, जलागम, धर्मस्व एवं संस्कृति मंत्री सतपाल महाराज टिरी मा पंचैत विभागा के उर्यूं कार्यक्रम मा बोलि।

प्रदेसा पंचायती राज, पर्यटन, लोक निर्माण, सिंचाई, ग्रामीण निर्माण, जलागम, धर्मस्व एवं संस्कृति मंत्री सतपाल महाराज न अपड़ा गढ़वाल भ्रमण दौरा मा टिरी जिलाधिकारी कार्यालय मा उर्यूं कार्यक्रम मा सिंचाई, सड़क अर पंचायतीराज विभागा 13 करोड़ 12 लाख 85 हजार रुप्यौं क 11 विकास योजनाऔं क सौगात दे अर पंचम राज्य वित्त आयोग बटि मिल्यां 12.46 करोड़ रुप्यौं क दुसर छमाही किस्त ग्राम पंचैतु का खातों मा ऑनलैन डाळी।

ऐ मौका फर उन्न टिरी बांध पुनवार्स मा हूंण वळि दिकदरि तैं लेकैकि वखक विधायकु क दगड़ मा बैठक कायी अर उंकी दिकदरि तैं हल करणा क बारा मा विचार बि कायी।

बैठक मा महाराजन दुसर जगा मा बस्यें जाण वळों तैं सरकारक तरफ बटि दियें जाण वळि रुप्यौं क मदत बगत पर नीं मिलण पर अधिकारियौं तैं खुब झपोड़ि (डांट) दे। महाराजन बोलि कि बांध विस्थापितौं क कारण हि सर्या देस तैं बिजली मिलणि च। इल्लै हमथैं उंकी सबि दिकदरियों कु हल करण प्वाड़ळु।

महाराज न मुख्यमंत्री क घोषणा क जरिया जनपद भिलंगना विकासखण्ड मा बूढ़केदार अर विनयखाल मा 4 करोड़ 88 लाख 74 हजार की (55.240 किमी.) 20 सिचैं कुळु कु सुदृढ़ीकरण योजना, भिंलगना विकासखण्ड मा घुत्तू बाजार अर देवंज ग्राम मा 4 करोड़ 85 रुप्यौं क बाढ़ सुरक्षा अर सिचैं योजनाओं कु शिलान्यास बि कायी।

पंचायतीराज मंत्री महाराज न राष्ट्रीय ग्राम स्वराज अभियान क जरिया जनपद क विकासखण्ड जाखणीधार क ग्राम पंचायत पिपोला ढुंग मा 10.00 लाख, ग्राम पंचायत मन्दार मा 20.00 लाख, विकासखण्ड चम्बा क ग्राम पंचायत पलास मा 15.00 लाख, ग्राम पंचायत कोलधार मा 15.00 लाख, ग्राम पंचायत वीड मा 15.00 लाख, विकासखण्ड भिलंगना क ग्राम पंचायत मेड मा 10.00 लाख रुप्यौं से बणण वळा पंचायत भवन कु शिलान्यास बि कायी।

ऐ मौका फर धनसाली विधायक शक्ति लाल शाह, टिहरी विधायक किशोर उपाध्याय, प्रतापनगर विधायक विक्रम सिंह नेगी, जिला पंचायत अध्यक्ष सोना सजवाण, नगर पालिका अध्यक्ष सीमा, भाजपा जिलाध्यक्ष राजेश नौटियाल, जिला महामंत्री उदय रावत, राजेन्द्र जुयाल, जिलाधिकारी सौरभ गहरवार, टीएचडीसी क ईडी एल.पी जोशी,जाखणीधार ब्लाक प्रमुख सुनीता देवी, चम्बा ब्लाक प्रमुख शिवानी बिष्ट, प्रमुख भिलंगना वशुमति धणाता अर वरिष्ठ भाजपा नेता खेम सिंह चौहान वखम छायीं।