साळ 2025 तक प्रदेस तैं नशा मुक्त बण्यें जाळु : मुख्यमंत्री धामी

देरादूण। मुख्यमंत्री पुष्कर सिंह धामी न जिला कारागार, देरादूण मा मिशन ड्रग्स फ्री देवभूमि ’ सुरू कायी अर बोलि कि उत्तराखण्ड सरकार न देवभूमि उत्तराखण्ड तैं साळ 2025 तक नशामुक्त बणौंण क सौं लियीं च।

मुख्यमंत्री न बोलि या सौं पूरि करणा खूंणि सरकार क दगड़ ज्वान नौन्याळु, एनजीओ अर प्रदेस क रैवासी , स्कुळु तैं अगनै आण प्वाड़ळु अर सब्यौं तैं मिळिकि काम करण प्वाड़ळु अर सरकार कु ऐ अभियान तैं महा अभियान बणौंण प्वाड़ळु।

ऐ मौका फर मुख्यमंत्री न जिला कारागार मा बण्यीं बेकरी यूनिट कु लोकार्पण भि कायी अर जिला कारागार मा वेदान्त फाउण्डेशन क जरिया चलणु कम्प्यूटर प्रशिक्षण केन्द्र, कारागार अलंकार प्रदर्शनी, महिला बन्दियों कु बण्यीं प्रदर्शनी थैं भि देखि। मुख्यमंत्री न बोलि कि प्रदेस क सबि कारागारों मा नशा मुक्ति अभियान का बारा मा बत्यें जाण चैंद।

ऐ मौका फर अपर मुख्य सचिव श्रीमती राधा रतूड़ी, विधायक सहदेव सिंह पुण्डीर, महानिरीक्षक कारागार श्रीमती विमला गुंज्याल, विशेष सचिव गृह श्रीमती रिद्धिम अग्रवाल, सुभारती मेडिकल कॉलेजाक डॉ. प्रशान्त भटनागर, डॉ. तपस्या राजलक्ष्मी शाह छायीं।