हरद्वार लोकसभा सीट, हरक न बोलि भैजी थैं भुला खूंणि छ्वणन प्वड़दी गद्दी

पैल्यक मुख्यमंत्री हरीश रावत अर हरक सिंह रावत एक दा दुबरा सिंग पल्यौंणा छन। हरक सिंह रावत कांग्रेस मा त ऐग्यीं पर हरीश रावत तैं आंखा दिखौंणा मा कबि पिछने नीं रैंद। विधानसभा चुनौ बटि चुप्प रैंण वळा हरक सिंह रावत एकदा दुबरा छ्वियों मा छन। अब छ्वीं हूंणि च कि हरक सिंह रावत अब हरद्वार लोकसभा सीट बटि चुनौं लड़णा क तत्यरि करणा छन।

लोकसभा चुनौ 2024 मा अबि बगत च पर कांग्रेस मा हरद्वार सीट मा अबि बटि घमाचूर ह्वैग्यें। ह्वै इन्न च कि हरक सिंह रावत न हरद्वार बटि चुनौं ताळ ठोकि दे। इन्न मा साफ च हरक सिंह रावत हरद्वार लोकसभा सीट मा हरीश रावत खूंणि दिक्कत खड़ी करणा छन।

कांग्रेस क हत्थ से हत्थ ज्वड़णा क जातरा क सुरुवात कैकि हरक सिंह न धर्मपुर, डोईवाला अर हरद्वार क विधानसभौं मा मनखियों तैं ज्वड़णा कोसिस करणा छन।

हरक सिंह रावतन बोलि कि हरद्वार लोकसभा बटि कै थैं टिकट मिलळु , यु काम च पार्टी कु च। फर हरीश रावत भैजी छन अर बड़ा भैजि थैं भुला खूंणि गद्दी छ्वणन प्वड़दी। उन्न बोलि हरीश रावत जरुर आशीष देळा।

त दुसर तरफौं हरीश रावत खूंणि हरद्वार लोकसभा सीट खास च, अर ऊंकी इच्छा हरद्वार सीट बटि चुनौं लड़णा क च। इन्न मा या बात त साफ च लोकसभा चुनौं 2024 मा हरद्वार सीट तैं लेकैकि हरीश अर हरक क बीच मा घपरोल हूंण तय च।