उत्तराखण्ड मा बढ़िग्यीं 30 प्रतिशत बोटर

देरादूण। उत्तराखड मा पिछळ 10 साळु मा खळाखळ बढ़दा जाणा बोटरौं क प्रदेस मा जांच ह्वैळी। भारत निर्वाचन आयोग न 9 जनवरी 2023 खूंणि सबि जिलाधिकारियौं अर जिला निर्वाचन अधिकारियौ तैं चिट्ठी लेकिख सबि जिळौं मा जिला स्तर, विधानसभा तोक अर मतदान केन्दु्र मा कमेटि बण्यें की जांच करणा क आदेश दियूं च। राज्य निर्वाचन आयोग संयुक्त मुख्य निर्वाचन अधिकारी प्रताप सिंह न जांच पूरि कै कि 28 फरवरी 2023 तक रिपोर्ट देणा खूंणि बोळि याली।

बतै दियां की साल 2022 मा उत्तराखण्ड विधानसभा क बाद एसडीसी फाउंडेशन न पिछळ 10 साळु मा प्रदेस मा खास कैकि सैंणाक तोक (मैदानी क्षेत्र) मा बोटरु क संख्या मा खळाखळ बढ़ौतरी हूंणा क बारा मा खबरदार कैकि निर्वाचन आयोग क आंकड़ों फर डेमोग्राफिक चेंजज, डिस्ट्रिक्ट अपडेट एंड कन्सिट्वेंसी नंबर्स जारी कै छायीं। जैका अनुसार उत्तराखण्ड मा 2012 बटि 2022 मा बोटरु संख्या मा 30 प्रतिशत बढ़ोतरी ह्वै।

अनूप नौटियाल क त्यार रिपोर्ट फर पैल्यका आईएफएस अधिकारी डाॅ. वीके बहुगुणा न मुख्य चुनाव आयुक्त , प्रधानमंत्री अर उत्तराखण्ड मुख्यमंत्री थैं चिट्ठी लेखिक ऐ मामळु मा जांच करणा क मांग करणा छायीं। उन्न बोलि कि बोटरु क संख्या मा बढ़ौतरि हूंण से उत्तराखण्डा सांस्कृतिक अर पछ्याण तैं खतरा ह्वैग्यें। बहुगुणा न बोलि कि उत्तराखण्ड क कैरीइंग क्षमता कै साळ पैळि खतम ह्वैग्यें।

अब 10 साळ बाद ऐ मामळु मा राज्य निर्वाचन आयोग न अब सर्या प्रदेस मा जांच करणा क आदेश दे दीं।