जांच समिति क रिपोर्ट मा ह्वै खुलासा, विधानसभा मा 2001 बटि 2021 तक ह्वीं सबि 396 भर्ति गलत

देरादूण। उत्तराखण्ड विधानसभा मा ह्वीं भर्ति खूंणि बणि जांच समिति न 2001 बटि 2021 तक विधानसभा मा ह्वीं 396 भर्ति थैं गलत तरीकों न ह्वीं भर्ति बतै। जांच समिति क 217 पन्नों क रिपोर्ट मा यु खुळासा ह्वैं।

पैरा 12 मा सबि 396 भर्ति थैं असंवैधानिक बत्यें ग्यें। जैमा साफ ब्वलें ग्यें कि विधानसभा सचिवालय मा साळ 2001 बटि 2022 तक जु बि भर्ति ह्वीं सबि भर्तियौं मा भर्ति हूंण वळों तैं एक जनि (समानता) कु मौका नी दियेग्यें, जु संविधान अनुच्छेद 14 अर अनुच्छेद 16 कु उल्लंघन च।

पैरा 11 मा सबि भर्ति मा नियमु कु उल्लंघन हूंणा क बात ब्वलें ग्यें। जैमा बिना समिति बणैं कि भर्ति, भर्ति खूंणि विज्ञापन अर क्वीं बि सूचना नीं दियेग्यें अर ना हि रोजगार दफतर बटि नौ मंग्यें गीं, बिना आवेदन मंगै कि सिरफ एक चिट्ठी फर भर्ति कर्यें ग्यें। भर्ति खूंणि क्वीं इमत्यान नी ह्वैं अर भर्ति मा उत्तराखण्ड प्रदेस क अनुसूचित जाति, जनजाति अर पिछड़ि जाति अर औरि जातियौं थैं भर्ति करणा क बारा मा क्वीं बन्दबस्त (आरक्षण कु फैदा) कर्यें ग्यें।

पैरा 3 मा 2001 बटि ह्वीं भर्ति का बारा मा बत्यें ग्यें। जैमा साळ 2001 मा 53, 2002 मा 28, साल 2003 मा 5, साळ 2004 मा 18, साळ 2005 मा 08, साल 2006 मा 21, साळ 2007 मा 27 साळ 2008 मा 1, साळ 2013 मा 01, साळ 2014 मा 7, साळ 2017 मा 149, साळ 2020 मा 6, साळ 2021 मा 72 भर्ति कर्यें ग्यीं। साळ 2009 बटि 2012, 2015, 2017 बटि 2019 अर 2022 मा क्वीं भर्ति नी ह्वै बत्यें ग्यें।

आख्या क पैरा 4 मा जौ 393 पदु क बारा मा बत्यें ग्यें वै मा 24 पदु कु जिकर च।

जैमा प्रतिवेदक क 20 पद, सम्पादक क 5, अनुभाग अधिकारी (शोध एवं संदर्भ) क 1, डिप्टी मार्शल कु 1, सूचना अधिकारी कु 1, अपर निजी सचिवा 40, समीक्षा अधिकारी क 13, सहायक समीक्षा अधिकारी क 78, सहायक समीक्षा अधिकारी (शोध एवं सदर्भ) क 14, सहायक समीक्षा अधिकारी (लेखा) क 20, उप प्रोटोकोल अधिकारी क 4, व्यवस्थापक क 3, सूचीकार क 8, कम्प्यूटर सहायक क 14, कम्प्यूटर आॅपरेटर क 3, स्वागती क 4, महिला रक्षक क 15, रक्षक पुरूष क 49, तकनीशियन क 2, हाउसकीपिंग सहायक क 2, डैरबर क 22, फोटोग्राफर कु 1, डाक रनर कु 1, अर कन्डैकटर क 75 पद छन।

पैल्यक आईएएस दिलीप कोटिया, सुरेन्द्र सिंह रावत अर अवनेन्द्र सिंह नयाल क समिति न सबि भर्तियों थैं गलत बतै अर मुकेश सिंघल क सचिव विधानसभा क तरक्कि थैं बि गलत बतै।

यांक बाद उन्न भवैष्य मा सुधार करणा खूंणि 15 सलाह बि दीं।