74 वु गणतंत्र दिवस, राज्यपाल रि. ले. जनरल गुरमीत सिंह (सेवानिवृत) न फैर्यें तिरंगा

देरादूण। 74 वु गणतंत्र दिवस मा देरादूण पेरट गिरौण्ड मा उर्यूं कार्यक्रम मा राज्यपाल रि. ले. जनरल गुरमीत सिंह न तिरंगा फैर्यें। जैका बाद राज्यपाल न प्रदेस क रैवासियौं तैं गणतंत्र दिवसा शुभकामना दे। ऐ मौका फर सीआरपीएफ, उत्तराखण्ड पुलिस, पीएसी, होमगार्ड अर पीआडी क ज्वानु क दगड़ मा एनसीसी क कैडिटु न परेट कायी अर राज्यपाल तैं सलामी दें। यांक दगड़ स्कुळयां नौन्याळु न सांस्कृतिक लोक नृत्य बि कायी।

पेरट गिरौण्ड मा उर्यूं कार्यक्रम मा महिला सशक्तीकरण अर बाल विकास विभाग, ग्राम्य विकास, पर्यटन विभाग, उद्यान विभाग, शिक्षा विभाग, स्वास्थ्य विभाग, वन विभाग, उद्योग विभागा क झाँकियों न प्रदर्शन कायी।

ऐ मौका फर राज्यपाल अर मुख्यमंत्रीन धामीन उत्तराखण्ड पुलिस कु ‘विजन डाॅक्यूमंट’ कु अनावरण कायी अर अच्छु काम करण वळा पुलिस कर्मियों तैं सम्मानित कायीं।

गणतंत्र दिसवा क मौका फर राज्यपाल लेफ्टिनेंट जरल गुरमीत सिंह (सेवानिवृत) अर मुख्यमंत्री धामी सड़क हादसा मा घैळ ऋषभ पंत क मदद करण वळा हरियाणा रोजवेज क डैबर सुशील कुमार व कन्डैक्टर परमजीत तैं सम्मानित कायी। यु सम्मान द्वियों क कुटुम्दरि न लें। मुख्यमंत्री न डैबर अर कन्डैक्टर द्वियों तैं एक-एक लाख रुप्यौं क सम्मान राशि अर प्रशस्ति पत्र, स्मृति चिन्ह भि दे। ऐ मौका फर द्वी औरि नौना नीशु अर रजत थैं तैं सम्मानित कर्यें ग्यें।

पेरट गिरौण्ड मा उर्यूं कार्यक्रम मा सांसद नरेश बंसल, मेयर देरादूण सुनील उनियाल गामा, विधायक खजान दास, मुख्य सचिव डॉ. एस. एस. संधु, डी.जी.पी. अशोक कुमार क दगड़ मा बड़ा अधिकारी छायीं।