8 तकनीकी संस्थानु न अपड़ि रिपोर्ट राष्ट्रीय आपदा प्रबंधन प्राधिकरण थैं दे याळी: सचिव आपदा प्रबन्धन

देरादूण। सचिव आपदा प्रबन्धन डाॅ. रंजीत कुमार सिन्हा न जोशीमठ नगर तोक भ्वां धसणि जमीन अर भूस्खलन क बाद राज्य सरकारक बचाव क कामु अर जोशीमठा रैवासियों तैं दुबरा बस्यें जाणा क बारा मा आज बुधवार खूंणि मीडिया सेन्टर सचिवालय मा मीडिया तैं जाणकारि दे अर बतै कि जोशीमठ मा राहत क तौर पर 3.77 करोड़ रुप्या 307 कुटुम्दरि तैं दियें ग्यें।

सचिव आपदा न बोलि कि जोशीमठ मा भ्वां मा धसणि जमीना क बारा मा सबि 8 तकनीकी संस्थानु न अपड़ि पैळि रिपोर्ट राष्ट्रीय आपदा प्रबंधन प्राधिकरण (एनडीएमए) थैं दे द्यायी।

सचिव आपदा न बोलि कि जोशीमठ मा उद्यान विभागा क जमीन फर बणण वळि माॅडल प्री फैब्रिकेटेड शेल्टर कु काम पूरु हंूण वळु च। ढाक गौ, चमोली मा प्री फैब्रिकेटेड शेल्टर बणौंणा कु काम चलणु च। उन्न बोलि कि अबि औरि कुड़ौं मा तिड़क्वाल प्वड़णि छन।

सचिव आपदा प्रबन्धन बतै कि जोशीमठ मा पैळि 06 जनवरी 2023 खूंणि पाणि 540 एल.पी.एम. निकळणु छायीं, जु अब घटिक 181 एलपीएम ह्वैग्यें।

उन्न बालि कि राहत शिविरू मा जोशीमठ मा कुल 661 कमरा छन, जैमा 2957 मनखि रै सकदन। पीपलकोटी मा 491 कमरा छन, जैमा 2205 मनखि रै सकदन। उन्न बोलि अबि तक 863 कुड़ौं मा तिड़क्वाळ प्वडणि छन। जैमा गांधीनगर मा 01, सिंहधार मा 02, मनोहरबाग मा 05, सुनील में मा तोक अब रैण लैक नी छन। 181 कुड़ा असुरक्षित तोक मा छन। 286 कुटुम्दरि तैं विस्थापित कर्यें ग्यें। विस्थापित कुटुम्दरि क मनखियों क संख्या 957 च।