सतपाल महाराजन कायी संस्कृति निदेशालय अर गढ़वाल मण्डल विकास निगम मुख्यालय कु घप्प निरीक्षण

देरादूण। प्रदेसा पर्यटन, लोक निर्माण, सिंचाई, पंचायती राज, ग्रामीण निर्माण, जलागम, धर्मस्व एवं संस्कृति मंत्री सतपाल महाराजन संस्कृति निदेशालय अर गढ़वाल मण्डल विकास निगम मुख्यालय कु घप्प (अचानक) जैकि निरीक्षण कायी।

संस्कृति मंत्री सुबेर 10 बजिक 30 मिनट फर संस्कृति सचिव हरीशचन्द्र सेमवाल के दगड़ मा घप्प एमडीडीए, डालनवाळा संस्कृति निदेशालय मा पौंचिग्यीं। सतपाल महाराजन कळाकारू अर सांस्कृतिक दळु क बिळ, जौ कु भुगतान नीं ह्वै, वां फर अपड़ि नराजगी जतै अर बोलि कि झट यु बिळु कु भुगतान कर्यें ज्यां।

जै का बाद पर्यटन मंत्री सतपाल महाराज न राजपुर रोड गढ़वाल मण्डल विकास निगम मुख्यालय मा घप्प जैकि निरीक्षण कायी अर महाप्रबंधक विप्रा त्रिवेदी थैं निर्देश दीं कि सबि रुक्यां बिळु कु झट भुगतान कर्यें ज्यां।

महाराजन बोलि कि कर्मचारियों कु ग्रेजुएटी अर एरियर जनि सबि दकदरियों कु जल्दी समाधान कर्यें जाळु।

महाराजन महाप्रबंधक विप्रा त्रिवेदी तैं बोलि कि गढ़वाल मण्डल विकास निगमा क कै गेस्ट हाउस इन्ना छन जौ कु क्वीं उपयोग नीं हूंणि च। महाराजन बोलि कि वु गेस्ट हाउस थैं बेरोजगारु तैं दियें जाणा कु बन्दोबस्त कर्यें ज्यां। उन्न बोलि कि कै बि काम मा क्वीं बि लापरवै नीं हूंण चैंद।