उत्तराखण्ड चारधाम देवस्थानम प्रबंधन बोर्ड हूंदू त प्रदेस पैसौं क क्वीं कमी नीं हूंदि : त्रिवेन्द्र सिंह रावत

देरादूण। जोशीमठ क जु हलात छन वु कैसे लुक्यां नीं छन। सरकार जोशीमठा क रैवासियों तैं वख बटि दुसर जगा मा बसयें जाणु च। जै खूंणि सरकार थैं पैंसौं क दरकार च। अर प्रदेस सरकार क टक केन्द्र सरकार फर लगि च कि वु मदद कराळु।

इन्न मा पैल्यक मुख्यमंत्री त्रिवेन्द्र सिंह रावतन बोलि कि उत्तराखण्ड चारधाम देवस्थानम प्रबंधन बोर्ड हूंदू त प्रदेस सरकार तैं पैसौं क क्वीं कमी नीं हूंदि।

पैल्यक मुख्यमंत्री न बोळ कि उत्तराखण्ड चारधाम देवस्थानम प्रबन्धन बोर्डन प्रदेस सरकार तैं कम से कम सवा सौ करोड़ रुप्यौं क कमै हूंदि। उन्न बोलि कि उत्तराखण्ड चारधाम देवस्थानम प्रबन्धन बोर्ड से ज्वा कमै हूंदि वा से जोशीमठ आपदा मा प्रभावित जु बि कुटुम्दरि छल वुथैं दुसर जा मा बस्यें जान्दु अर प्रदेस सरकार तैं पैसौं का बारा मा कखि भटकण नीं प्वाड़दु।

पैल्यक मुख्यमंत्री न बोलि कि कुछ फैसळौं कु फैदा बाद मा हूंद पर यु हमरु दुर्भाग्य च कि ळोग देवस्थानम प्रबंधन बोर्ड क फैदा कु बारा मा समझि नीं साका।