विधानसभा अध्यक्षा न अफसरु तैं कोटद्वारा क असलियत दिख्यें अर कोटद्वार कु बन्दुबस्त ठीक करणा खूंणि बोळि

कोटद्वार: ऋतु खण्डूड़ी न आज कोटद्वार सैर कु बन्दबस्त दय्खण खूंणि अफसरु तैं अपड़ दगड़ मा घुमें। ऐ मौका फर उन्न अफसरु तैं कोटद्वारा क असलियत दिख्यें अर कोटद्वार कु बन्दुबस्त थैं ठीक करणा खूंणि बोळि।

ह्वै इन्न च कि विधानसभा अध्यक्ष कोटद्वार एक कार्यक्रम मा छायीं। उन्न कोटद्वारा सैर कु बन्दुबस्त तैं देखि अर अपड़ि नराजगी जतै। जैका बाद उन्न जिलाधिकारी आशीष चौहान क दगड़ मा अफसरु तैं अपड़ा दगड़ा मा सर्या सैर घुमयें। उन्न वु – वु जगा दिख्यें जखा का बन्दुबस्त ठीक नीं छायीं। ऋतु खण्डूडी न कोटद्वारा मा कण्वाश्रम बटि निरीक्षण सुरु कायी। उन्न जिलाधिकारी तैं पूछि कि ऐ तोक तैं कन्नु कै कि विकसित कर्यें ज्या? जैसे कण्वाश्रमा क पछ्याण विश्वा मा ह्वै सक्यां अर यखक ळोगु थैं पर्यटन के ताक मा नै अवसर मिळि सक्यां।

विधानसभा अध्यक्षा न सुखरो नदी मा पुळ कु बि निरीक्षण कायी। उन्न बाढ़ा क कारण हूंण वळु कटाव क बारा मा वाटर रिटेंशन वाॅल थैं बण्यें जाणाक निर्देश दीं। उन्न बोलि कि बौत बगत बटि यख काम पूरा नीं हूंणा छन, जै पर उन्न डीएम आशीष कुमार तै फटाफट निर्माण कामु तैं करणा क निर्देश दीं।