जिला प्रशासन न हेलंग बाईपास अर एनटीपीसी तपोवन विष्णुगाड जल विद्युत परियोजना कु काम फर लग्यें दे रोक

चमोळी। जोशीमठ मा खळाखळ धसणि जमीन थैं देखिक चमोळी प्रशासन बड़ी परियोजनाऔं फर रोक लग्यें दे। जैमा हेलंग बाईपास अर एनटीपीसी तपोवन विष्णुगाड जल विद्युत परियोजना छन।

जोशीमठ मा खळाखळ जमीन भ्यां मा बैट्ठदा जाणि च जैथैं देखिक जिला प्रशासन न हेलंग बाईपास अर एनटीपीसी तपोवन विष्णुगाड जल विद्युत परियोजना हूंण वळा कामु फर रोक लग्यें दे। अर जु -जु कुटुम्दरि दिकररि मा छन उतैं वख बटि दुसरि जगा मा बस्यें जाणु च। जिला प्रशासन एनटीपीसी अर एचसीसीस कम्पनी खूंणि द्वी -द्वी हजार प्री फेब्रिकेटेड घौर बणौंणा क आदेश दे दीं।

जोशीमठ मा खळाखळ जमीन भ्वां बैट्ठदां जाणि च। जै कारण जोशीमठ क रैवासी डर्यां छन। पिछळ साल नम्बर बटि जोशीमठ क घौरु म तिड्वाळ (दरार) प्वड़णि च। अर भ्वां बटि जगा-जगा पाणि निकळणु च। घौरु मा तिड्वाळ प्वड़ना क कारण जेपी कम्पनी न अपड़ि पूरी कळोनी थैं खाळी कै याळी।

दुसर तरफौं मुख्यमंत्री धामी न बोलि कि वु एक टोळा क दगड़ जोशीमठ क दसा तैं देख्यणा खूंणि जाळा।