बेरोजगारी क बान हरीश रावतन नंगि खुट्टौं कायी जातरा

देरादूण। प्रदेस मा खळाखल बढ़दा जाणि बेरोजगारी क बान प्रदेस सरकार फर दबाव बणौंणा खूंणि आज हरीश रावतन नंगि खुट्टौं जातरा कायी।

आज मंगलबार खूंणि पैल्यक मुख्यमंत्री हरीश रावतन डिस्पेंसरी मा राजीब गांधी क मूर्ति बटि पद जातरा सुरू कायी अर घंटाघौर मा बणि स्व. इंद्रमणि बडोनी क मूर्ति मा फुळ चढ़कि ऊथैं श्रद्धांजळि दे।

हरीश रावतन बोलि कि आज सरकार बेरोजगार नौन्याळु थैं भटकौंणा कु काम करणि च। उन्न बोलि कि प्रदेस मा 85 हजार पद खाळी छन अर प्रदेस सरकार खाळु पदु थैं भ्वरणा खूंणि कुछ बि नी करणि च।

हरीश रावतन बोलि कि पिछळ साल जतगा नौकरि लगि वै से जादा नौन्याळ निकळि ग्यीं, उन्न बड़ी उमेद से इमत्यान दे छायीं पर इमत्यान भर्ति रद्द ह्वैग्यें अर नौन्याळु क नौकरि क आस टूट ग्यें।